Paippalāda-Saṃhitā · Chapter 20.2

ayā viṣṭhā janayan karvarāṇi
sa hi ghṛṇir urur varāya gātuḥ |
sa praty ud aid varuṇo madhvo agraṃ
svāṃ yat tanūṃ tanvām airayata ||

yajñena yajñam ayajanta devās
tāni dharmāṇi prathamāny āsan |
te ha nākaṃ mahimānaḥ sacante
yatra pūrve sādhyāḥ santi devāḥ ||

yajño babhūva
sa ā babhūva
sa pṛthivyā adhipatir babhūva |
sa pra jajñe sa u vāvṛdhe punaḥ
so asmāsu draviṇam ā dadhātu ||

devā yad devān haviṣāyajant-
-āmartiyān manasāmartyena |
bravāma tatra parame vyoman
vadema tad uditau sūryasya ||

mugdhā devā uta śunāyajant -
-ota gor aṅgair bahudhāyajanta |
ya imaṃ yajñaṃ manasānvavindat
pra ṇo vocat tam iheha bravāma ||

yat puruṣeṇa haviṣā
devā yajñam atanvata |
kva svit tad adya no brūyād
yadi havyenejire ||

indraḥ sutrāmā svavām̐ avobhiḥ
sumṛḍīko bhavatu viśvavedāḥ |
bādhatāṃ dveṣo abhayaṃ kṛṇotu
suvīryasya patayaḥ syāma ||

sa sutrāmā svavām̐ indro asmad
ārāc cid dveṣaḥ sanutar yuyota |
tasya vayaṃ sumatau yajñiyasy -
-āpi bhadre saumanase syāma ||

yas te pṛthu stanayitnur ya ṛṣvo
yo daivaḥ ketur viśvam ābhūṣatīdam |
mṛḍayā no vidyutā deva sasyāya
mota vadhī raśmibhiḥ sūryasya ||

yas te stanaḥ śasayur yo mayobhūr
yaḥ sumnayuḥ suhavo yaḥ sudakṣaḥ |
yena viśvā vanasi vāryāṇi
sarasvatī tam iha dhātave kaḥ ||