Scripture Library

Paippalāda-Saṃhitā · Chapter 20.22

20.22.1

māṃ vadantam anu sarve vadantu
māṃ prāṇantam anu prāṇantu sarve |
māṃ viśantam anu sarve viśantu
mayi devā ekavṛto bhavantu ||

20.22.2

sūryo mā cakṣuṣaḥ pātu
bṛhaspatir vācaḥ somo rājā sabhāyāḥ |
indro vo dṛśe bhavāmi ||

20.22.3

veda vai te sabhe nāma
subhadrāsi sarasvati |
atho ye te sabhāsadas
te me santu suvācasaḥ ||

20.22.4

imā yā brahmaṇaspate
viṣūcīr vāca īrate |
sadhrīcīr indra tāḥ kṛtvā
mahyaṃ śivatamāḥ kṛdhi ||

20.22.5

aham eṣāṃ hastarasam
ahaṃ vijñānam ā dade |
sarvasyā asyāḥ saṃsado
'haṃ bhūyāsam uttama
indro yo gāyatām iva ||

20.22.6

uttamaṃ mottame kṛdhy
uttamā hi babhūvitha |
yāṃ tvā bhuraṇyur anvaicchad
gandharvaḥ śaradaḥ śatam ||

20.22.7

abhibhūr aham āgamam
ahaṃ bhūyāsam uttamaḥ |
idaṃ pratipravādinaṃ
dviṣantam ava dhūnve ||

20.22.8

uruṣ ṭe vastir bhavatu
samudrasya bilaṃ yathā |
parodakam iva sicyatāṃ
mūtraṃ te tanvas pari ||

20.22.9

yathā vāto yathodakaṃ
yathā samudra ejati |
evā te garbha ejatu
niraitu daśamāsyo
bahir jarāyuṇā saha ||

20.22.10

idam u śreyo 'vasānam āgāṃ
śive me dyāvāpṛthivī abhūtām |
asapatnāḥ pradiśo me bhavantu
na vai tvā dviṣmo abhayaṃ no astu ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0