Paippalāda-Saṃhitā · Chapter 20.21

divas pṛthivyāḥ pary antarikṣād
vātāt paśubhyo adhy oṣadhībhyaḥ |
yato lakṣmīr vṛjinā saṃbabhūva
sā brahmaṇā pracyutā dūram etu ||

vālkutsasya ca gandhena
hiraṇyavarcasena ca |
āt puṣkariṇyā yo gandho
bhago mā tena jinvatu ||

yad indro agre asurāñ jaghāna
tato lakṣmīr ny adadhur martyeṣu |
tāsāṃ pāpiṣṭhā nir ataḥ suvāmaḥ
śivā asyai jātavedo ni yaccha ||

yā tvā lakṣmīr devṛghnī yā patighnī
gṛhebhyas tvā nudate yā vyāḍā |
atas tvam enaso mucyamān-
-ot taremāḥ srotyāḥ sapta sākam ||

nipiṃśantīṃ nitudantīṃ
saṃpibantīṃ nyakvarīm |
prabhaṅgāṃ bhrūṇaghnīṃ lakṣmīṃ
brahmaṇā tā anīnaśam ||

udojiṣṭhāṃ sahasyāṃ
jayantīm aparājitām |
lakṣmīr yāḥ puṇyāḥ kalyāṇīs
tā asyai savitaḥ suva ||

lakṣmyaḥ sam alapsata
sam alapsata lakṣmyaḥ |
ajaiṣur bhadrā lakṣmyaḥ
parā pāpīr ajeṣata ||

lakṣmīṇāṃ lakṣmītame
lakṣmīṇām adhipā asi |
tāṃ tvāhaṃ śuddho gopsyāmi
devajā hi babhūvitha ||

sabhā ca mā samitiś cāvatāṃ
prajāpater duhitarau sacetasau |
yena saṃgacchā upa mā sa tiṣṭhād
antar vadāni hṛdaye janānām ||

sabhā senā samitis tvām avantu
prajāpater duhitaraḥ pracetasaḥ |
yena vadāny upa mā sa śikṣād
antar vadāni hṛdaye janānām ||