પૈપ્પલાદ-સંહિતા · અધ્યાય 20.22

માં વદન્તમ્ અનુ સર્વે વદન્તુ
માં પ્રાણન્તમ્ અનુ પ્રાણન્તુ સર્વે ।
માં વિશન્તમ્ અનુ સર્વે વિશન્તુ
મયિ દેવા એકવૃતો ભવન્તુ ॥

સૂર્યો મા ચક્ષુષઃ પાતુ
બૃહસ્પતિર્ વાચઃ સોમો રાજા સભાયાઃ ।
ઇન્દ્રો વો દૃશે ભવામિ ॥

વેદ વૈ તે સભે નામ
સુભદ્રાસિ સરસ્વતિ ।
અથો યે તે સભાસદસ્
તે મે સન્તુ સુવાચસઃ ॥

ઇમા યા બ્રહ્મણસ્પતે
વિષૂચીર્ વાચ ઈરતે ।
સધ્રીચીર્ ઇન્દ્ર તાઃ કૃત્વા
મહ્યં શિવતમાઃ કૃધિ ॥

અહમ્ એષાં હસ્તરસમ્
અહં વિજ્ઞાનમ્ આ દદે ।
સર્વસ્યા અસ્યાઃ સંસદો
ઽહં ભૂયાસમ્ ઉત્તમ
ઇન્દ્રો યો ગાયતામ્ ઇવ ॥

ઉત્તમં મોત્તમે કૃધ્ય્
ઉત્તમા હિ બભૂવિથ ।
યાં ત્વા ભુરણ્યુર્ અન્વૈચ્છદ્
ગન્ધર્વઃ શરદઃ શતમ્ ॥

અભિભૂર્ અહમ્ આગમમ્
અહં ભૂયાસમ્ ઉત્તમઃ ।
ઇદં પ્રતિપ્રવાદિનં
દ્વિષન્તમ્ અવ ધૂન્વે ॥

ઉરુષ્ ટે વસ્તિર્ ભવતુ
સમુદ્રસ્ય બિલં યથા ।
પરોદકમ્ ઇવ સિચ્યતાં
મૂત્રં તે તન્વસ્ પરિ ॥

યથા વાતો યથોદકં
યથા સમુદ્ર એજતિ ।
એવા તે ગર્ભ એજતુ
નિરૈતુ દશમાસ્યો
બહિર્ જરાયુણા સહ ॥

ઇદમ્ ઉ શ્રેયો ઽવસાનમ્ આગાં
શિવે મે દ્યાવાપૃથિવી અભૂતામ્ ।
અસપત્નાઃ પ્રદિશો મે ભવન્તુ
ન વૈ ત્વા દ્વિષ્મો અભયં નો અસ્તુ ॥