Paippalāda-Saṃhitā · Chapter 20.23

vāstoṣpata iha naḥ śarma yaccha
bhadrāc chreyo abhi no neṣa vasyaḥ |
ariṣṭā vīrā iha me bhavantu
dvipāc catuṣpān mayy astu puṣṭam ||

anamīvo vāstoṣpate
viśvā rūpāṇy āviśan |
sakhā suśeva edhi naḥ ||

ṛtena sthūṇā adhi roha vaṃś-
-ogro virājann apa vṛṅkṣva śatrūn |
mā te riṣann upasattāro atra
virājāṃ jīvāc charadaḥ śatāni ||

ā rohataṃ pakṣāv amṛtaṃ vasānau
dampatyoḥ kṛṇutaṃ dīrgham āyuḥ |
tatra nārī putriṇī jīvapatn-
-īdaṃ kulāyam upasaṃviśāti ||

agnir mā viśvād duritāt punātu
mātariśvā pavamānaḥ purastāt
somo mā pātu maruto bṛhaspatir
vāyuś ca mā pavamānaḥ punītām ||

tvayā satyaṃ vi jayante
tava satyaṃ vivācanam |
agre vṛkṣasya jāyase
semaṃ janaya pūruṣam ||

vṛkṣasya śataśākhasya
mādhuntasya nikṛtvanaḥ |
vibhīdakasya yat phalaṃ
tena tvon mādayāmasi ||

pūrve vātāt pra patataṃ
pūrve patatam aśvibhyām |
ime nyarvaṇī aham
udnevāgnim avīvare ||

mā yakṣmam iha hāsiṣṭa
mā riphanto vi gātana |
subhūtam asmabhyaṃ dhatta
yuṣmān anv etu kilbiṣam ||

iha varca iha paya
iha cakṣur upa hvaye |
ihendriyaṃ dadhātana ||