Paippalāda-Saṃhitā · Chapter 20.19

yat ta ātman tanvāṃ ghoram asti
yad vā keśeṣu praticakṣaṇe vā |
tat te vidvān apa bādhe ahaṃ
pra tvā suvāt savitā saubhagāya ||

nir lakṣmyaṃ lalāmyaṃ
nir arātiṃ suvāmasi |
yathā no vasyasīd aso
rāyaspoṣam ihā suva ||

agnim accha devayatāṃ manāṃsi
cakṣūṃṣīva sūryaṃ saṃ caranti |
yadī suvāte uṣasā virūpe
śveto vājī jāyate agre ahnām ||

indro rājā jagataś carṣaṇīnām
adhi kṣami viṣurūpaṃ yad asti |
tato dadāti dāśuṣe vasūni
codad rādha upastutaś cid arvāk ||

śakunir bhūtvā pra babhasti pippalaṃ
patyāṃ niviṣṭā yadi vā gha patnyām |
bhīmā ghorā lakṣmyaḥ sahabhavyās
tā ito haviṣā nir yajāmaḥ ||

yā te gṛheṣūta vā dhaneṣu
prajāṃ lakṣmīr yadi vā te babhasti |
tāṃ bṛhaspatir haviṣā bādhamāno
nirhūya pra dadhmāv adhi dūram asmat ||

riśyapadīṃ riśadvatīṃ
goṣedhāṃ vidhamām uta |
vilīḍhyaṃ vyādhyaṃ
brahmaṇā tā anīnaśam ||

pratyoṣantīm utsaṅginīm
uta cchidrām utāraṇīm |
siṃhīṃ jyeṣṭhalakṣmīṃ
vyāghrīṃ nāśayāmasi ||

anudhyāyinīṃ paricarāṃ
vibādhām uta hiṃsatīm |
rodasya patnīṃ rodhanāṃ
pra tā dhamāmi lakṣmyaḥ ||

vāmaspṛhāṃ pitṛṣadaṃ
yeṣantīṃ tapanīm uta |
asidhyantīṃ pradhvaṃsinīm
aṣṭrāvadhāṃ ca lakṣmyaṃ
brahmaṇā tā anīnaśam ||