Paippalāda-Saṃhitā · Chapter 20.18

abhi prāgāt sahasrākṣo
yuktvā śapatho ratham |
śaptāram anvicchan yātu
vṛka ivāvimato gṛham ||

pari ṇo vṛṅdhi śapatha
hradam agnir iva dahan |
śaptāram atra tvaṃ jahi
divyā vṛkṣam ivāśaniḥ ||

yo naḥ śapād aśapataḥ
śapato yaś ca naḥ śapāt |
vṛkṣa iva vidyutā hata
ā mūlād anu śuṣyatu ||

śaptāraṃ yantu śapathā
yaḥ suhārt tena naḥ saha |
jihvāślakṣṇasya durhārdaḥ
pṛṣṭīr api śṛṇīmasi ||

yaṃ dviṣmo yaś ca no dveṣṭy
aghāyur yaś ca naḥ śapāt |
śune peṣṭram ivāvakṣāmaṃ
taṃ praty asyāmi mṛtyave ||

preto yantu vyādhyaḥ
prānudhyāḥ pro aśastayaḥ |
agnī rakṣasvinīr hantu
somo hantu durasyatīḥ ||

pra catetaḥ pāpi lakṣmi
naśyetaḥ prāmutaḥ pata |
ayasmayenāṅkena
yaṃ dviṣmas tasmin tvā sṛjāmaḥ ||

yā tvā lakṣmīḥ patayālūr ajuṣṭ -
-ādhicaskanda vandaneva vṛkṣam |
anyatrāsmat savitas tām ito dhā
hiraṇyahasto vasu no rarāṇaḥ ||

nir araṇīṃ savitā sāviṣat pador
nir hastayor varuṇo mitro aryamā |
nir ādityā anumatī rarāṇāḥ
pra ṇaḥ suvāt savitā saubhagāya ||

ekaśataṃ lakṣmyaḥ
sākaṃ martyasya januṣeha jātāḥ |
tāsāṃ pāpiṣṭhā nir ataḥ pra hiṇmaḥ
śivāsmabhyaṃ jātavedo ni yaccha ||