પૈપ્પલાદ-સંહિતા · અધ્યાય 20.19

યત્ ત આત્મન્ તન્વાં ઘોરમ્ અસ્તિ
યદ્ વા કેશેષુ પ્રતિચક્ષણે વા ।
તત્ તે વિદ્વાન્ અપ બાધે અહં
પ્ર ત્વા સુવાત્ સવિતા સૌભગાય ॥

નિર્ લક્ષ્મ્યં લલામ્યં
નિર્ અરાતિં સુવામસિ ।
યથા નો વસ્યસીદ્ અસો
રાયસ્પોષમ્ ઇહા સુવ ॥

અગ્નિમ્ અચ્છ દેવયતાં મનાંસિ
ચક્ષૂંષીવ સૂર્યં સં ચરન્તિ ।
યદી સુવાતે ઉષસા વિરૂપે
શ્વેતો વાજી જાયતે અગ્રે અહ્નામ્ ॥

ઇન્દ્રો રાજા જગતશ્ ચર્ષણીનામ્
અધિ ક્ષમિ વિષુરૂપં યદ્ અસ્તિ ।
તતો દદાતિ દાશુષે વસૂનિ
ચોદદ્ રાધ ઉપસ્તુતશ્ ચિદ્ અર્વાક્ ॥

શકુનિર્ ભૂત્વા પ્ર બભસ્તિ પિપ્પલં
પત્યાં નિવિષ્ટા યદિ વા ઘ પત્ન્યામ્ ।
ભીમા ઘોરા લક્ષ્મ્યઃ સહભવ્યાસ્
તા ઇતો હવિષા નિર્ યજામઃ ॥

યા તે ગૃહેષૂત વા ધનેષુ
પ્રજાં લક્ષ્મીર્ યદિ વા તે બભસ્તિ ।
તાં બૃહસ્પતિર્ હવિષા બાધમાનો
નિર્હૂય પ્ર દધ્માવ્ અધિ દૂરમ્ અસ્મત્ ॥

રિશ્યપદીં રિશદ્વતીં
ગોષેધાં વિધમામ્ ઉત ।
વિલીઢ્યં વ્યાધ્યં
બ્રહ્મણા તા અનીનશમ્ ॥

પ્રત્યોષન્તીમ્ ઉત્સઙ્ગિનીમ્
ઉત ચ્છિદ્રામ્ ઉતારણીમ્ ।
સિંહીં જ્યેષ્ઠલક્ષ્મીં
વ્યાઘ્રીં નાશયામસિ ॥

અનુધ્યાયિનીં પરિચરાં
વિબાધામ્ ઉત હિંસતીમ્ ।
રોદસ્ય પત્નીં રોધનાં
પ્ર તા ધમામિ લક્ષ્મ્યઃ ॥

વામસ્પૃહાં પિતૃષદં
યેષન્તીં તપનીમ્ ઉત ।
અસિધ્યન્તીં પ્રધ્વંસિનીમ્
અષ્ટ્રાવધાં ચ લક્ષ્મ્યં
બ્રહ્મણા તા અનીનશમ્ ॥