Paippalāda-Saṃhitā · Chapter 20.15

yad annam admi bahudhā virūpaṃ
hiraṇyam aśvam uta gām ajām avim |
yad eva kiṃ ca pratijagrahāham
agniṣ ṭad viśvād agadaṃ kṛṇotu ||

yad āśasā me carato janām̐ anu
yācamānasya vadato vicukṣubhe |
yan me tanvo manaso viriṣṭaṃ
sarasvatī tad ā pṛṇād ghṛtena ||

yad ārima pratigṛhṇanta enaḥ
siṣāsanto balim agne carantaḥ |
tvaṃ nas tasmād enaso mumugdhi
vaiśvānaraḥ prati havyā gṛbhāya ||

cakṣuṣaḥ pāśān manasaś ca pāśād
vīkṣāyāḥ pāśād uta śakvarīṇām |
tasmān mumugdhi viśvāvaso tvaṃ no
dātṝṇāṃ dānaṃ bhunajāmahai vayam ||

adur me viśve devā
adāt savitedam |
adān me brahmaṇaspatiḥ
priyo mitro adād idam ||

indreṇa medinā yuj-
-āpa bādhe pṛtanyataḥ |
adhare santu śatravaḥ ||

agnir indraś ca yad yuvaṃ
hato vṛtrāṇy aprati |
ugrā hi vṛtrahantamā ||

agnim indraṃ ca yad vayaṃ
purodhāyai havāmahe |
tau no mṛḍāta īdṛśe ||

yābhyāṃ svar ajayann agre
yāv ātasthatur bhuvanā juṣāṇā |
pracarṣaṇī vṛṣaṇā vajrabāhū
agnim indraṃ vṛtrahaṇā huvema ||

yayor ojasā stabhitā rajāṃsi
yau vīryair vīratamā śacībhiḥ |
yau patyete apratītau sahobhir
viṣṇum agan varuṇaṃ pūrvahūtiḥ ||