Paippalāda-Saṃhitā · Chapter 20.14
payasvatīr oṣadhayaḥ
payasvan māmakaṃ vaca ity ekā ||
ayam agnir vareṇya
āyuṣ ṭe viśvato dadhat |
punas tvā prāṇa āyati
parā yakṣmaṃ suvāmi te ||
janād viśvajanīnaṃ
viśām urukṣitīnām |
dūrāt tvā manya ābhṛtam
īrṣyāyā nāma bheṣajam ||
dūrād etat saṃ bharant-
-īrṣyāyā nāma bheṣajam |
tat saṃvegasya bheṣajaṃ
tad aśnā saṃgṛbhāyikam ||
agner iva dahato
dāvasya dahato yathā |
etām etasyerṣyāṃ hṛda
udnāgnim iva vāraye ||
apa mārjmy apanayan
manyuṃ te hṛdayād adhi |
amuṣminn īrṣyām ā dadhmas
tatro enāṃ ni dadhmasi ||
tiraścirājer asitāt
pṛdākor adhi saṃbhṛtam |
tat kaṅkaparvaṇo viṣam
iyaṃ vīrud adūduṣat ||
iyaṃ vīrun madhujātā
madhuścun madhulā madhu
sā vihrutasya bheṣajy
atho maśakajambhanī ||
yato daṣṭaṃ yataḥ pītaṃ
tatas tvā nir ṇayāmasi |
abhryasya tṛpradaṃśino
maśakasyārasaṃ viṣam ||
ayaṃ yo vikhyo vikaṭo viparvā
mukhāny eṣāṃ vṛjinā kṛṇoṣi |
tāni tvaṃ deva savitar
iṣīkām iva saṃ namaḥ ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0