Paippalāda-Saṃhitā · Chapter 20.16

yayor apsu na mahimā nadīṣu
praririce pradivi rocanāyām |
yayor asty anumatir bhūyiṣṭhā
viṣṇum agan varuṇaṃ pūrvahūtiḥ ||

yayor idaṃ pradiśi yad virocate
prajām ati vi ca caṣṭe śacībhiḥ |
mahaṛtasya dharmāṇā yuvānā
viṣṇum agan varuṇaṃ pūrvahūtiḥ ||

ubhā jigyathur na parā jayethe
na parā jigye kataraś canaiva vām |
indraś ca viṣṇo yad apaspṛdhethāṃ
tredhā sahasraṃ vi tad airayethām ||

yad aśuddhaṃ yad anṛtaṃ
yac carāmasi pāpayā |
āpo mā tasmād enaso
duritāt pāntu viśvataḥ ||

duṣvapnyaṃ durjīvitam ity ekā ||

yad avāmṛkṣata kṛṣṇaśakunir
mukhena nirṛte tava |
agniṣ ṭat sarvaṃ śundhatu
havyavāḍ ghṛtasūdanaḥ ||

yad asmān kṛṣṇaśakuner
niṣpatya tata ānaśe |
āpo mā tasmād enaso
duritāt pāntu viśvataḥ ||

agnir mā pātu prathamo durarmaṇo
nirṛtyāṃ viśvā duritāni mṛjmahe |
viśve mā devā marutaḥ punantu
varuṇo rājā savitā pavitraiḥ ||

antarikṣeṇa patati
yātudhānanibādhitaḥ |
stokaṃ yam abhyacuścutat
tam u syonaṃ kṛṇomi te ||

yat tvā kṛṣṇo abhyamṛkṣad
devebhyas pari nirhataḥ |
śivaṃ te tanve tat kṛṇmo
vi te pāśāṃś cṛtāmasi ||