Paippalāda-Saṃhitā · Chapter 19.9

idāvatsarāya parivatsarāya
saṃvatsarāya kṛṇutā bṛhan namaḥ |
teṣāṃ vayaṃ sumatau yajñiyānām
api bhadre saumanase syāma ||

ye vaḥ panthā bahavo devayānā
anu dyāvāpṛthivī saṃcarantī |
teṣām ajyāniṃ yatamo na āvahāt
tasmai no devāḥ pari dhatta sarve ||

śarad dhemantaḥ śiśiro vasanto
grīṣmo varṣāḥ suvite no dadhāta |
ā no goṣu bhajatauṣadhīṣu
nivāta id vaḥ śaraṇe syāma ||

vaiśvānaro na ūtaya
ā pra yātu parāvataḥ |
agnir ukthair no aṃhasaḥ ||

vaiśvānaro na ā gamad
imaṃ yajñaṃ sajūr upa - |
-imāṃ suṣṭutiṃ mama ||

vaiśvānaro no aṅgirobhi
stomaṃ yajñaṃ ca cākl̥pat |
aiṣu dyumnaṃ svar yamat ||

ajaiṣaṃ tvā saṃlikhitam
ajaiṣam uta saṃrudham |
aviṃ vṛko yathā mathad
evā mathnāmi te kṛtam ||

yathā vṛkṣam aśanir
viśvahā hanty aprati |
evāham amuṃ kitavam
akṣair vadhyāsam aprati ||

turāṇām aturāṇāṃ
viśāṃ devayatīnām |
sam aitu viśvato bhago
antarhastaṃ kṛtaṃ mama ||

yāvad dyaur yāvat pṛthivī
yāvad ābhāti sūryaḥ |
tāvat sṛjāmi te viṣaṃ
yāvad arṣanti sindhavaḥ ||

ucchvasanta ud īrate
gāva āvasathād iva |
ahīnāṃ paśyatā viṣam
apavaktā na vidyate ||

ā jaghāna pṛṣaddhanuḥ
saṅgathe dhamanīnām |
mūrdhānaṃ viṣam āskadya-
-aṅgāni vy asisrasat ||

mā no devā ahir vadhīt
santokān sahapūruṣān |
saṃyataṃ na vi ṣparad
vyāttaṃ na saṃ yamat ||

saṃ te dadhāmi dadbhir
dataḥ saṃ te hanvā hanū |
saṃ te jihvayā jihvāṃ
saṃ ta āsnāha āsyam ||

namo 'haye asitāya
namas tiraścirājaye |
svajāya babhrave namo
namo devajanebhyaḥ ||