Paippalāda-Saṃhitā · Chapter 19.8

dyauś ca mā pṛthivī ca pracetasau
śukro bṛhan dakṣiṇā mā pipartu |
anu svadhā cikitāṃ somo agnir
vāyur mā yātu savitā bhagaś ca ||

punar manaḥ punar āyur na āgan
punaś cakṣuḥ punar ākūtir āgan |
vaiśvānaro no adabdhas tanūpā
antas tiṣṭhāti duritād avadyāt ||

saṃ varcasā payasā saṃ tanūbhir
aganmahi manasā saṃ śivena |
tvaṣṭā sudatro varivaḥ kṛṇotv
anūnas tāṣṭu tanvo viriṣṭam ||

idaṃ tad yuja uttaraṃ
yenendraṃ śumbhāmy aṣṭaye |
asya kṣatraṃ śriyaṃ mahīṃ
vṛṣṭir iva vardhayā tṛṇam ||

asya kṣatram agnīṣomāv
asya vardhayataṃ rayim |
atho rāṣṭrasyābhīvarge
kṛṇutaṃ yuja uttaram ||

sabandhuś cāsabandhuś ca
yo jāto yaś ca niṣṭiyaḥ |
yajamānāya sunvate
sarvaṃ taṃ rīradhāsi naḥ ||

yaśo bṛhad vardhatām indrajūtaṃ
sahasrabhṛṣṭi sukṛtaṃ sahasvat |
prasarsrāṇam anu dīrghāya jīvase
haviṣmantaṃ vardhaya sarvatātaye ||

yaśā indro yaśā agnir
yaśāḥ somo ajāyata |
yaśā viśvasya bhūtasya-
-aham asmi yaśastamaḥ ||

vayaṃ te agne yaśaso yaśobhir
yaśasvino haviṣainā vidhema |
sa no dhehi rāṣṭram indrajūtaṃ
tava trātre adhivāke syāma ||

ava jyām iva dhanvano
manyuṃ tanomi te hṛdaḥ |
adhā saṃmanasau bhūtvā
sakhikeva sacāvahai ||

vi te manyuṃ nayāmasi
sakhikeva sacāvahai |
adhas te aśmanā manyuṃ
guruṇābhi ni dadhmasi ||

abhi tiṣṭhāmi te manyuṃ
pārṣṇibhyāṃ prapadābhyām |
parā te daṇḍyaṃ vadhaṃ
parā manyuṃ suvāmi te ||

hiraṇyayaḥ panthā āsīd
aritrāṇi hiraṇyayā |
nāvo hiraṇyayīr āsan
yābhiḥ kuṣṭhaṃ nirāvaham ||

suparṇasuvane girau
jātaṃ himavatas pari |
dhanair abhi śrutaṃ yanti
kuṣṭhehi takmanāśanaḥ ||

yo giriṣu jāyase
vīrudhāṃ balavattamaḥ |
kuṣṭhehi takmanāśana
takmānaṃ nāśayann itaḥ ||