Paippalāda-Saṃhitā · Chapter 19.10

manase cetase dhiya
ākūtaya uta cittaye |
matyai śrutāya cakṣase
vidhema haviṣā vayam ||

prāṇāyāpānāya
vyānāya bhūriretase |
sarasvatyā uruvyace
vidhema haviṣā vayam ||

mā no hāsiṣur ṛṣayo daivyāsas
tanūpāvānaḥ śucayas tapojāḥ |
amartyā martyām̐ abhi naḥ sacadhvam
āyur naḥ prataraṃ jīvase dhuḥ ||

idam id vā u bheṣajam
idaṃ rudrasya bheṣajam |
yeneṣum ekatejanāṃ
śataśalyām apabruvan ||

jālāṣenābhi ṣiñcata
jālāṣenopa siñcata |
jālāṣaṃ bhadraṃ bheṣajaṃ
tasya no dhatta jīvase ||

śaṃ ca no mayaś ca no
mā ca naḥ kiṃ canāmamat |
kṣamā rapo viśvaṃ no astu bheṣajam ||

yaśasaṃ mendro maghavān kṛṇotu
yaśasaṃ somo varuṇo vāyur agniḥ |
yaśasaṃ mā devaḥ savitā kṛṇotu
priyo dātur dakṣiṇāyāḥ syām aham ||

yathendro dyāvāpṛthivyor yaśasvān
yathāpa oṣadhīṣu |
yathā viśveṣu deveṣv
evā deveṣu yaśasaḥ syāma ||

accha vayam indraṃ yaśasaṃ yaśobhir
yaśasvino haviṣainā vidhema |
sa no dadhad rāṣṭram indrajūtaṃ
tasya trātre adhivāke syāma ||

eha yātu varuṇaḥ somo agnir
bṛhaspatir vasubhir eha yātu |
asya śriyam abhisaṃyāta sarva
ugrasya cettuḥ saṃmanasaḥ sajātāḥ ||

eha yāta māpa yātādhy asmat
pūṣā vaḥ parastād apathaṃ kṛṇotu |
vāstoṣpatir anu vo 'yam ahvan
mayi sajātā ramatir vo astu ||

yo vaḥ śuṣmo hṛdayeṣv antar
yā ākūtir manasi praviṣṭā |
tāñ chrevayāmi haviṣā ghṛtena
mayi sajātā ramatir vo astu ||

mama cittaṃ prayavasanyutetve-
-indrāgnyor iva havam eta sarve |
bṛhaspatir vo ni yunaktu mahyaṃ
mama vācam ekacittāḥ sacadhvam ||

ahaṃ gṛhṇāmi manasā manāṃsi
mama cittam upa cittebhir eta |
mama vaśe hṛdayaṃ vaḥ kṛṇomi
mama yātam anuvartmāna eta ||

māṃ vaś cakṣur gacchatu māṃ prāṇo
dhātā padam anu vartma vaḥ kṛṇotu |
ye vo mahānta uta ye kumārā
mama yātam anu yātebhir eta ||