Paippalāda-Saṃhitā · Chapter 19.4

ṛtāvānaṃ vaiśvānaram
ṛtasya jyotiṣas patim |
ajasraṃ gharmam īmahe ||

sa idaṃ prati paprathad
yajñasya svar uttiran |
ṛtūn ut sṛjate vaśī ||

agniḥ priyeṣu dhāmasu
kāmo bhūtasya bhavyasya |
samrāḍ eko vi rājati ||

pari dyām iva sūryo
ahīnāṃ janim āgamam |
rātrī jagad ivānyad dhaṃsād
avārīr imaṃ viṣam ||

yad brahmabhir yad ṛṣibhir
yad devair uditaṃ purā |
yad bhūtaṃ bhavyam āsanvat
tena te vāraye viṣam ||

madhunāpṛkṣi nadyaḥ
parvatā girayo madhu |
madhu paruṣṇī śīpālā
śam āsne astu śaṃ hṛde ||

yatheyam urvī pṛthivī
dādhāra viṣṭhitaṃ jagat |
evā te dhriyatāṃ garbho
anu sūtuṃ savitave ||

(…)
dādhāremān vanaspatīn |
(…) ||

yatheyam urvī pṛthivī
dādhāra parvatān apaḥ |
evā te dhriyatāṃ garbho
anu sūtuṃ suvitave ||

sasruṣīs tad apaso
divā naktaṃ ca sasruṣīḥ |
vareṇyakratur aham
apo devīr upa bruve ||

oktā āpaḥ karmaṇyā
muñcantv itaḥ praṇītaye |
sadyo bhavantv etave ||

devasya savituḥ save
karma kṛṇvanti mānuṣāḥ |
śaṃ no bhavantv apa oṣadhīr imāḥ ||

śatasya te dhamanīnāṃ
sahasrasya hirāṇām |
asthur in madhyamā yāḥ
sākam antā araṃsata ||

pari vaḥ sikatāmayīr
dhanūs tiraś cid asthiran |
tiṣṭhatelayatā su kam ||

amūr yā yanti jāmayaḥ
sarvā lohitavāsasaḥ |
abhrātara iva yoṣās
tiṣṭhanti hatavarcasaḥ ||

tiṣṭhāvare tiṣṭha para
uta tvaṃ tiṣṭha madhyame |
kaṇiṣṭhikā ca tiṣṭhāti
tiṣṭhād id dhamanir mahī ||