Paippalāda-Saṃhitā · Chapter 19.3

śaśvad didyut kriyamāṇā
pratīcī ni hi paptat |
pratyak kartāram ṛcchatu ||

śaśvantam ic chāśadānam
anyasmā iṣuṃ dihānam |
pratīcī śarur ṛcchatu ||

yad etad bhūri śāśadat
pratīcīnam apohase |
viṣād iva viṣam addhi tat ||

namas te pravato napād
yatas tapaḥ samūhase |
mṛḍā nas tanūbhyaś
śaṃ nas tokebhyas kṛdhi ||

pravato napān namo astu tubhyaṃ
namas te hetaye tapuṣyai |
vidma te dhāma paramaṃ guhā yat
samudre antar nihitāsi nābhiḥ ||

yāṃ tvā devā ajanayanta viśva
iṣuṃ kṛṇvānā asanāya tṛṣvīm |
sā no mṛḍa vidathe gṛṇānā
mitrasya ca varuṇasya praśiṣṭau ||

yūyaṃ naḥ pravato napān
marutaḥ sūryatvacaḥ |
śarma yacchātha saprathaḥ ||

mamṛḍatā suṣūdatā
mṛḍā no aghnyābhyaḥ |
tokāya tanve ca ||

namas te astu vidyute
namas te stanayitnave |
namas te astv aśmane
yenā dūḍāśe asyasi ||

yo asmān brahmaṇaspate
'devo abhidāsati |
sarvaṃ taṃ rīradhāsi naḥ ||

yebhiḥ soma sāhantya-
-asurān randhayāsai |
tebhir no 'vitā bhuvaḥ ||

yāni devā asurāṇām
ojāṃsy avṛṇīdhvam |
tebhir no adhi vocata ||

ud enam uttaraṃ naya-
-agne ghṛtebhir āhutaḥ |
sam enaṃ varcasā sṛja
devānāṃ bhāgadhā asat ||

indremaṃ prataraṃ kṛdhi
sajātānām asad vaśī |
rāyaspoṣeṇa saṃ sṛja
prajayā ca bahuṃ kṛdhi ||

yasya kṛṇmo gṛhe havis
tam agne vardhayā tvam |
tasmai somo adhi bruvad
ayaṃ ca brahmaṇaspatiḥ ||