Paippalāda-Saṃhitā · Chapter 19.5

namo devavadhebhyo
namo rājavadhebhyaḥ |
atho ye viśyānāṃ vadhās
tebhyo mṛtyo namāṃsi te ||

namas te adhivākāya
parāvākāya te namaḥ |
sumatyai mṛtyo te namo
durmatyai ta idaṃ namaḥ ||

namas te yātudhānebhyo
namas te bheṣajebhyaḥ |
mūlebhyo mṛtyo te namo
brāhmaṇebhya idaṃ namaḥ ||

nava ca yā navatiś ca
saṃyanti manyā abhi |
itas tāḥ sarvā naśyantu
vākā apacitām iva ||

sapta ca yāḥ saptatiś ca
saṃyanti skandhyā abhi |
(itas tāḥ sarvā naśyantu
vākā apacitām iva) ||

pañca ca yāḥ pañcāśac ca
saṃyanti graivyā abhi |
itas tāḥ sarvā naśyantu
vākā apacitām iva ||

āvayo anāvayo
rasas ta ugra āvayo |
ā te karambham adīmahi
sa hi na tvam asi yas
tvam ātmānam āvayaḥ ||

babhruś ca babhrukarṇaś ca
nīlākalaśālā |
śavaḥpaśya ||

tauvilike 'velayā-
-avāyam ailava ailayīt |
iha svām āhutiṃ
juṣāṇo manasā svāhā ||

svāhā manasā yad idaṃ kṛṇomi
yasyās ta āsañ juhomi ghore |
eṣāṃ baddhānām avasarjanāya kam ||

bhūmir iti tvābhipramanvate janā
nirṛtir iti tvāhaṃ pari veda viśvataḥ |
bhūte haviṣmaty asy eṣa te bhagas
tena te vidheyaṃ svāhā ||

evo ṣv asmat tvaṃ nirṛte viśvavāre
ayasmayān pra mumugdhi pāśān |
yamena tvaṃ yamyā saṃvidānā
yo asmān dveṣṭi yaṃ vayaṃ dviṣmas
tasmin tān pāśān prati muñca sarvān ||

uttamo asy oṣadhīnāṃ
tava vṛkṣā upastayaḥ |
upastir asmākaṃ bhūyād
yo 'smām̐ abhidāsati ||

sabandhuś cāsabandhuś ca
yo 'smām̐ abhidāsati |
sabandhūn sarvāṃs tīrtvā-
-ahaṃ bhūyāsam uttamaḥ ||

yathā soma oṣadhīnām
uttamaṃ havir ucyate |
evā tvam iva vṛkṣāṇām
ahaṃ bhūyāsam uttamaḥ ||