Paippalāda-Saṃhitā · Chapter 19.2

tvaṣṭā me daivyaṃ vacaḥ
parjanyo brahmaṇaspatiḥ |
putrair bhrātṛbhir aditir nu pātu no
duṣṭaraṃ trāmaṇe śavaḥ ||

aṃśo bhago varuṇo mitro aryamā-
-aditiḥ pātv aṃhasaḥ |
apa tasya dveṣo gamed
avihruto yāvayāc chatrum ? anti tam? ||

deva tvaṣṭar vardhaya sarvatātaye
dhiye sam u śriye prāvatān naḥ |
uruṣyā ṇa urutarāprayucchan
dyauṣ pitar yāvaya ducchunām itaḥ ||

ye no vacobhir uta daṃsanābhis
tanvaṃ soma paritāpayante |
nīcais tān vṛśca na yathā virukṣan
mā te dṛśan sūryam uccarantam ||

tvayeṣvā tvayā soma dhanvanā
tvayā muṣṭighnā śāśadmahe vayam |
tvaṃ tān vṛśca ya idaṃ na ? ādṛśākaran ?
hanāma daṇḍair uta daṃsanābhiḥ ||

padena tān padanyo nayantu
vadhair enān pitaro daṃsayantu |
yathā na jīvāt katamaś canaiṣām ||

yena somāditiḥ pathā
mitrā vā yanty adruhaḥ |
tenā no 'vitā bhuvaḥ ||

yo naḥ soma suśaṃsino
duḥśaṃso abhidāsati |
vajreṇāsya mukhe jahi
sa saṃpiṣṭo apāyati ||

yo naḥ somābhidāsati
sanābhir yaś ca niṣṭiyaḥ |
apa tasya balaṃ tira
mahīva dyaur vadha tmanā ||

punar agham aghakṛtam etu devāḥ
punar ena enaskṛtaṃ vijānat |
punaḥ putraḥ pitaram etu vidvān
hatām uta yad asya svam asti ||

yena cāsau śapati
yena cainaṃ śapāmasi |
ubhau saṃvṛhya tau tasmād
antikād dhetim asyatām ||

ye pārthivāsaḥ śapathā
ya urāv antarikṣe |
ye vātasya prabharmaṇi
tebhiṣ ṭaṃ vartayāmasi
yo 'smān dveṣṭi yaṃ vayaṃ dviṣmaḥ ||

ye asmān parisīsṛpuḥ
kulīpayāni bibhrataḥ |
ud devas teṣāṃ vṛścata
mūlam urvārvo yathā ||

yad devā aghadhā agham
anyasminn ā sisaṃkṣati |
bhāro aghasya duḥsahaḥ
pratyak kartāram ṛcchatu ||

punar evāghadhām aghaṃ
dyumnam ?ivaitur arṣatu |
ādityāduryāmahiṣā?
mahī sindhor ivāvaniḥ ||