Paippalāda-Saṃhitā · Chapter 19.26

agniś ca deva savitar
iṣam ūrjaṃ dadhānau |
pātaṃ mā duścaritād
ā mā sucarite bhajataṃ
yuvayor avasā sumnam aśīya ||

idaṃ tad upa yuva idaṃ tad upa hvaye
yac chuśrumā tvat pari |
vācaspatir ni yacchatu
mayy evāstu mama śrutam ||

māpatyāya steyaṃ karaṃ
mā śrutena vi rādhiṣi |
amogham asmākaṃ śrāntam
agne draviṇavat kṛdhi ||

madhyameṣṭhā varcasvatyā-
-āyuṣe varcase kṛtam |
vanuṣva viśvadeveṣu
vanuṣva tvaṃ bṛhaspatau ||

ghṛtena prajāṃ vanute
ghṛtena rayim aśnute |
ghṛtenāyuṣyaṃ varcasyaṃ
devebhyo vanute pari ||

parjanya pippalās tubhyaṃ
nadyo garbhaṃ svastaye |
maryādā brahmadevīr
āyuṣyaṃ varca āsican ||

yathā hastī hastinyāḥ
padena padam anv agāt |
evā tvam aghnye vatsasya
padena padam anv ihi ||

yathā rathasya cakre
vi pathaḥ pāṃsum asyathaḥ |
evā mano vy asyāmi
hṛdayaṃ vananāya kam ||

indrasya prathamaṃ vaco
devānām aparaṃ vacaḥ |
tṛtīyam aśvinor vacas
tena gāṃ vānayāmasi ||

ud itaḥ śyāvau vithurau
divaṃ gṛdhrāv iveyathuḥ |
śocanāv atiśocanāv
asyocchocanau hṛdaḥ ||

śocayābhi śocayā
dīpayopa dīpaya |
aher agne viṣaṃ tvaṃ
tṛṇam iva kalvalaṃ daha ||

sīdataṃ niṣattārāv
avetaṃ mod gatam |
kṛṣṇā vāṃ gauḥ sārasvatī ||

yathā rātrī kṛṣṇatamā
gauḥ kṛṣṇā kṛṣṇavartaniḥ |
śācīḥpyavo yathā rūpam
evedaṃ māmakaṃ śiraḥ ||

yathāṅgaro 'bhiṣikto
darvidāko yathāsitaḥ |
anuṣyaṅgasya kalmaṣam
evedaṃ māmakaṃ śiraḥ ||

yathā dāvād dahyamānāt
kṛṣṇo jvālo 'padhvaṃsate |
naiṣād asya yathā mukham
evedaṃ māmakaṃ śiraḥ ||