Paippalāda-Saṃhitā · Chapter 19.25

yūpe garte vidveṣaṇaṃ
devānāṃ varcasā kṛtam |
agnir vām astv antarā
yathā vāṃ na sahāsati ||

yathāhiṃ dveṣṭi puruṣo
ahir vā dveṣṭi puruṣam |
girir vām astv antarā
yathā vāṃ na sahāsati ||

nānāni vām ākūtāni
nānā cittāni santu vām |
viṣvañcau pary ā vartethāṃ
yathā vāṃ na sahāsati ||

atra dve kamale dve tuṇḍe
na maśīkataṃ taṃ galāpate |
bhaṅgalāpato (⟨ bhaṅgurāvato) daha ||

etad yat te yad vā yad vā
na cāsan no ca te bhavat |
svapne vittaṃ yathā dhanaṃ
naśyād id etad etataḥ ||

āgilo gilāpāpacito gila |
naśyād bradhnakam arbhakam ||

dīrghāyutvāya sahase
mahyā ariṣṭatātaye |
suparṇo mahyam abravīd
etad āśliṣṭabheṣajam ||

saktūn iva titaünā punanto
vidvāṃso vācam akrata |
aṅgebhyo viśvāṅgebhyaḥ
pra te chinadmy āśliṣṭam ||

avacchindhy āśliṣṭam
ūrvā hy asi bheṣajī |
divyaḥ suparṇo abravid
etad āśliṣṭabheṣajam ||

abhibhūr aham āgamaṃ
viśvakarmā svāyudhaḥ |
ahaṃ mitrasya kalpayann
āsv āśāsu duṣṭaraḥ ||

ahaṃ samityayano
ahaṃ viśāṃ purohitaḥ |
ahaṃ mitrāṇi kalpayan
mayi vāg astu dharṇasī ||

ā vaś cakṣur ā vo vācam
ā vaḥ samitiṃ dade |
yogakṣemaṃ va ādāya-
-ahaṃ bhūyāsam uttamaḥ ||

brahmaṇāgniḥ saṃvidāno
rakṣohā nudatām itaḥ |
arāyo yas te tanvaṃ
durṇāmā yonim āśaye ||

yas te 'rāyas tanvaṃ
durṇāmā yonim āśaye |
agniṣ ṭaṃ brahmaṇā yujā
rakṣohā nudatām itaḥ ||

yāny abhvāni rakṣāṃsi
ye 'rāyā yātudhānyaḥ |
agniṣ ṭvā śagmayā tanvā
rakṣohā pātu tebhyaḥ ||