Paippalāda-Saṃhitā · Chapter 19.27

yat kiṃ cāsau manasā yac ca vācā
yajñair juhoti haviṣā yajurbhiḥ |
tan mṛtyunā nirṛtiḥ saṃvidānā
purā dṛṣṭād ājyaṃ hantv asya ||

yātudhānā nirṛtir ād u rakṣas
te asya ghnantv anṛtena satyam |
indreṣitā ājyam asya mathnantu
mā tat saṃ pādi yad asau juhoti ||

pari tvāgne puraṃ vayaṃ
vipraṃ sahasya dhīmahi |
dhṛṣadvarṇa divedive
hantāraṃ bhaṅgurāvatām ||

svarjid adhirājau
śyenau saṃpātināv iva |
ājyaṃ pṛtanyato hataṃ
yo asmān pṛtanāyati ||

pṛthivyai vanaspatibhya oṣadhībhyo
'gnaye 'dhipataye svāhā ||

antarikṣāya prāṇāya vayobhyo
vāyave 'dhipataye svāhā ||

dive cakṣuṣe nakṣatrebhyaḥ
sūryāyādhipataye svāhā ||

pippalyaḥ sam avadanta-
-āyatīr jananād adhi |
yaṃ jīvam aśnavāmahai
na sa riṣyāti pūruṣaḥ ||

pippalī kṣiptabheṣajy
utāvaviddhabheṣajī |
tāṃ devāḥ sam akalpayann
alaṃ jīvātavā iti ||

asurās tvā ny akhanan
devās tvod avapan punaḥ |
vātīkṛtasya bheṣajī
pippalī kṣiptabheṣajī ||

yad ulūko vadati mogham etad
yat kapotaḥ padam agnau kṛṇoti |
yasya dūtau prahitāv idam eyathus
tasmai yamāya namo 'stu mṛtyave ||

yas te dūto nirṛta ājagāma-
-aprahitaḥ prahito vā gṛhaṃ naḥ |
kapotolūkāv apadaṃ tad astv
avairahatyam idam ā jagantha
suvīratāyā idam ā sasattha ||

yaḥ prathamaḥ pravata āsasāda
bahubhyaḥ panthām anupaspaśānaḥ |
ya īśe asya dvipado yaś catuṣpadas
tasmai yamāya namo 'stu mṛtyave ||

yathāsitaḥ prathayate vaśām̐ anu
vapūṃṣi kṛṇvann asurasya māyayā |
evā me śepaḥ sahasāyam arka
enāṅgena saṃsamakaṃ kṛṇotu ||

yāvad aṅgīnaṃ pārasvataṃ
hāstinaṃ gārdabhaṃ ca yat |
yāvad aśvasya vājinas
tāvan me vardhatāṃ pasaḥ ||

yathā pasas tāyādaraṃ
vātena sthūlabhaṃ kṛtam |
yāvat parasvataḥ pasas
tāvan me vardhatāṃ pasaḥ ||