Paippalāda-Saṃhitā · Chapter 19.19

ava mā pāpman sṛja
vaśī san mṛḍayāsi naḥ |
ā mā bhadreṣu dhāmasu
tvaṃ dhehy avihrutam ||

yo mā pāpman na jahāsi
tam u tvā jahimo vayam |
anyatrāsman ny ucya
sahasrākṣāmartya ||

pathor vayaṃ vyāvartane
niṣpāpmānaṃ suvāmasi |
yo no dveṣṭi taṃ gaccha
yaṃ dviṣmas taṃ jahi ||

śava ivāsi saṃnaddho
na bhogam avidaṃ tvayi |
śiro bhinadmi te pāpman
yathā na punar āyasi ||

indro asmān divā pātu
mṛtyoḥ pāśāt svastaye |
dyaur no madhyataḥ pātu
bhūmī rājñī svastaye ||

sūryo asmān divā pātu
mṛtyoḥ pāśāt svastaye |
vāto no madhyataḥ pātv
ahorātrī svastaye ||

somo asmān divā pātu
mṛtyoḥ pāśāt svastaye |
āpo no madhyataḥ pāntu
mā no nirṛtir īśata ||

saṃ vāṃ cakṣuḥ saṃ hṛdayaṃ
manasāvīvanaṃ manaḥ |
asyāḥ sarūpavatsāyā
ghṛte homena sarpiṣā ||

yat kakṣīvān saṃvananaṃ
putro aṅgirasām avet |
tena vām adya devāḥ
saṃ priyā sam avīvanan ||

saṃvananaṃ vāṃ manaso
atho saṃvananaṃ hṛdaḥ |
atho bhagasya yac chrāntaṃ
tena saṃ vānayāmi vām ||

ahaṃ te manasā manaś
cakṣur gṛhṇāmi cakṣuṣā |
evā pari ṣvajasva mā
yathāsan mayi te manaḥ ||

ā rathasyeva cakre
abhi mā vartatām asau |
reṣmacchinnaṃ yathā tṛṇaṃ
veṣṭāsau manasā mayi ||

pari tvā yātur asaraṃ
pari mātuḥ pari svasuḥ |
pari tvānyābhya strībhyo
'nayauṣadhyāsaram ||

ya indrasya sabhādhāno
yasmin samitim āsate |
hiraṇyaṃ yasya parṇāni
tasmā aśvattha te namaḥ ||

yaḥ śākhābhir antarikṣam
ā pūrayati niṣṭhayā |
chandāṃsi yasya parṇāni
tasmā aśvattha te namaḥ ||

yaṃ mṛgo na samāpnoti
pakṣābhyāṃ śakuniṣ patan |
divaṃ yaḥ sarvāṃ stabhnāti
tasmā aśvattha te namaḥ ||