પૈપ્પલાદ-સંહિતા · અધ્યાય 19.19

અવ મા પાપ્મન્ સૃજ
વશી સન્ મૃડયાસિ નઃ ।
આ મા ભદ્રેષુ ધામસુ
ત્વં ધેહ્ય્ અવિહ્રુતમ્ ॥

યો મા પાપ્મન્ ન જહાસિ
તમ્ ઉ ત્વા જહિમો વયમ્ ।
અન્યત્રાસ્મન્ ન્ય્ ઉચ્ય
સહસ્રાક્ષામર્ત્ય ॥

પથોર્ વયં વ્યાવર્તને
નિષ્પાપ્માનં સુવામસિ ।
યો નો દ્વેષ્ટિ તં ગચ્છ
યં દ્વિષ્મસ્ તં જહિ ॥

શવ ઇવાસિ સંનદ્ધો
ન ભોગમ્ અવિદં ત્વયિ ।
શિરો ભિનદ્મિ તે પાપ્મન્
યથા ન પુનર્ આયસિ ॥

ઇન્દ્રો અસ્માન્ દિવા પાતુ
મૃત્યોઃ પાશાત્ સ્વસ્તયે ।
દ્યૌર્ નો મધ્યતઃ પાતુ
ભૂમી રાજ્ઞી સ્વસ્તયે ॥

સૂર્યો અસ્માન્ દિવા પાતુ
મૃત્યોઃ પાશાત્ સ્વસ્તયે ।
વાતો નો મધ્યતઃ પાત્વ્
અહોરાત્રી સ્વસ્તયે ॥

સોમો અસ્માન્ દિવા પાતુ
મૃત્યોઃ પાશાત્ સ્વસ્તયે ।
આપો નો મધ્યતઃ પાન્તુ
મા નો નિરૃતિર્ ઈશત ॥

સં વાં ચક્ષુઃ સં હૃદયં
મનસાવીવનં મનઃ ।
અસ્યાઃ સરૂપવત્સાયા
ઘૃતે હોમેન સર્પિષા ॥

યત્ કક્ષીવાન્ સંવનનં
પુત્રો અઙ્ગિરસામ્ અવેત્ ।
તેન વામ્ અદ્ય દેવાઃ
સં પ્રિયા સમ્ અવીવનન્ ॥

સંવનનં વાં મનસો
અથો સંવનનં હૃદઃ ।
અથો ભગસ્ય યચ્ છ્રાન્તં
તેન સં વાનયામિ વામ્ ॥

અહં તે મનસા મનશ્
ચક્ષુર્ ગૃહ્ણામિ ચક્ષુષા ।
એવા પરિ ષ્વજસ્વ મા
યથાસન્ મયિ તે મનઃ ॥

આ રથસ્યેવ ચક્રે
અભિ મા વર્તતામ્ અસૌ ।
રેષ્મચ્છિન્નં યથા તૃણં
વેષ્ટાસૌ મનસા મયિ ॥

પરિ ત્વા યાતુર્ અસરં
પરિ માતુઃ પરિ સ્વસુઃ ।
પરિ ત્વાન્યાભ્ય સ્ત્રીભ્યો
ઽનયૌષધ્યાસરમ્ ॥

ય ઇન્દ્રસ્ય સભાધાનો
યસ્મિન્ સમિતિમ્ આસતે ।
હિરણ્યં યસ્ય પર્ણાનિ
તસ્મા અશ્વત્થ તે નમઃ ॥

યઃ શાખાભિર્ અન્તરિક્ષમ્
આ પૂરયતિ નિષ્ઠયા ।
છન્દાંસિ યસ્ય પર્ણાનિ
તસ્મા અશ્વત્થ તે નમઃ ॥

યં મૃગો ન સમાપ્નોતિ
પક્ષાભ્યાં શકુનિષ્ પતન્ ।
દિવં યઃ સર્વાં સ્તભ્નાતિ
તસ્મા અશ્વત્થ તે નમઃ ॥