Paippalāda-Saṃhitā · Chapter 19.20

jyeṣṭhaghnyāṃ jāto vicṛtor yamasya
māyaṃ hiṃsīḥ pitarau vardhamānaḥ |
syonau vyāghrā uta te śivau stām
ati neṣaṃ duritāni viśvā ||

vyāghre ahny ajaniṣṭa vīro
nakṣatrajāḥ sarvavīraḥ suvīraḥ |
sa mā hiṃsīḥ pitarau vardhamānas tasya
te devāḥ prati gṛhṇantu homam ||

yā rohiṇīr devapatyā
pra dhenur iva pinvate |
tatra tisro vyaṣṭakāḥ sarvām̐ adhi
bruvantu prajāyai jagate ca vām ||

yad ārdrābhyām araṇibhyāṃ devāḥ
śakrā amanthaṃ puruṣeṇa puruṣam |
atrāpuṣyataṃ mithunā sayonī
jīvāṃ prajāṃ jaradaṣṭiṃ sutejasā ||

hataṃ pataṅgam uta tardam ākhum aśvinā
bhintaṃ śiro mṛṇataṃ hanū dataḥ |
yathā naḥ sasyaṃ na ghasaṃ vyadvarā
evābhayaṃ kṛṇutaṃ dhānyāya naḥ ||

tarda hai pataṅga hai
jabhya hā upakvasa |
anadanta idaṃ dhānyam
ahiṃsanto apodita ||

tardapate vaghāpate
tṛṣṭadaṃśmā śṛṇota naḥ |
hotrevāprāśitaṃ havir
vṛkṇajihvā upādhvam ||

tarda jabhyāpijihvayā
ya imaṃ divyaṃ pīyūṣaṃ
prathamas titṛpsāt |
taṃ pratyañcam arciṣā vidhya marman ||

ye abhrajā ye vātajā
ye divas pari jajñire |
marīcyāḥ putrāṇāṃ vayam
api nahyāma āsyam ||

ye arjunā ye haritā
ye kṛṣṇā ye ca rohitāḥ |
kabandhasya praśāsane
śalabhyāñ jambhayāmasi ||

antarikṣeṇa patata
mā sasyam abhi paddhvam |
girīṇāṃ sānuṣu sīdata
tṛṇaṃ kapālam attana
śalabhās tad viśām iva ||

yathāśvāso yathā dhuraṃ
yuktā vahanti sādhuyā |
evā mūtra pra bhidyasva
vi vaster āsyaṃ sṛja ||

viṣitaṃ te vastibilaṃ
samudrasyodadher iva |
pra te bhinadmi mehanaṃ
vartraṃ veśantyā iva ||

yāḥ samudrād uccaranti
jaratīr upajihvikāḥ |
pramehaṇasya tā vidur
ubhayor mehanasya ca ||

śīrṣṇo valīr āsno valīr
aṅgādaṅgān mukhād valīḥ |
sarvās tā indrāṇī valīr
apa mārṣṭv adhi tvacaḥ ||

yās tvaci valayo jātā
yā jātās tanvas pari |
sarvās tā indrāṇī valīḥ
śamīśākhāsv ā sajāt ||

ā śamīṃ māmakī valī
rurohāti jahāti mām |
etām indrasya jāyā
validhānīm akṛṇvata ||