Paippalāda-Saṃhitā · Chapter 19.18

yās te hirā dhamanayo
'ṅgāny anu viṣṭhitāḥ |
tāsāṃ te sarvāsāṃ sākaṃ
nir viṣāṇi hvayāmasi ||

yāṃ te rudra iṣum āsthad
aṅgebhyo hṛdayāya ca |
imāṃ tām adya te vayaṃ
viṣūcīṃ vi vṛhāmasi ||

namas te rudrāsyate
namaḥ pratihitābhyaḥ |
namo visṛjyamānābhyo
namas ta āyatābhyaḥ ||

avācīḥ pari mūrdhno
yās te dhamanayaḥ śatam |
tās te pra bhidyantāṃ
pṛthag anu tyaṃ lohitāvaṭam ||

syandantāṃ rodanāvatīr
anu tyaṃ lohitāvaṭam |
yathāsyām antar na raṃsantām
anukūlam ivodakam ||

pratīcīnaḥ sūrya etu
pratīcīḥ sravataḥ kṛtāḥ |
avācīs te asnaḥ kulyā
iyaṃ tṛṇattv oṣadhīḥ ||

imaṃ yavam aṣṭāyogaiḥ
ṣaḍyogebhir acarkṛṣuḥ |
sa ghā te tanvo rapaḥ
pratīcīnam apa vyayat ||

nyag vāto vāti
nyak tapati sūryaḥ |
nīcīnam aghnyā duhe
nyag bhavatu te rapaḥ ||

āpa id vā u bheṣajīr
āpo amīvacātanīḥ |
āpaḥ samudrārthā yatīḥ
parā vahantu te rapaḥ ||

amī ye yudham āyanti
ketūn kṛtvānīkaśaḥ |
indras tān pary ahār dāmnā
tān agne sandyā tvam ||

yāvatīḥ sica āyanty
anīkāni yati ṣṭan |
indras tān pary ahār dāmnā
tān agne sandyā tvam ||

saṃ paramān sam avamān
atho sandyāni madhyamān |
indras tān pary ahār dāmnā
tān agne sandyā tvam ||

sandānaṃ vo bṛhaspatiḥ
sandānaṃ savitā karat |
sandānam indraś cāgniś ca
sandānaṃ bhago aśvinā ||

yās te ruco deva sūrya -
-udyato divy ātatāḥ |
tābhir mām adya sarvābhir
manuṣyebhyo ruce kṛṇu ||

ruce mā dhehi brahmasu
ruce rājasu dhehi mā |
ruce viśyeṣu śūdreṣu
mayi dhehi ruce rucim ||

yā ruco hiraṇye
yā agnau yāś ca sūrye |
indrāgnī mayi tā ruco
ruco dhehi bṛhaspate ||