Paippalāda-Saṃhitā · Chapter 17.51

dhruveyaṃ virāṇ namo astv asyai
śivā putrebhya uta mahyam astu |
sā no devy adite viśvavāra
irya iva gopā abhi rakṣa pakvam ||

piteva putrām̐ abhi saṃ sacasva naḥ
śivā no vātā iha vāntu śagmāḥ |
yam odanaṃ pacato devate iha
taṃ nas tapa uta satyaṃ ma vittām ||

yadyat kṛṣṇaḥ śakuna eha gatvā
tsaraṃ viṣaktaṃ bila āsasāda |
dāsī vā yad ārdrahastā samaṅkta
ulūkhalaṃ musalaṃ śundhatāpaḥ ||

ayaṃ grāvā pṛthubudhno vayodhāḥ
pūtaḥ pavitrair apa hantu rakṣaḥ |
ā roha carma mahi śarma yaccha
mā dampatī pautram aghaṃ ni gātām ||

vanaspatiḥ saha devair na āgan
rakṣaḥ piśācām̐ apabādhamānaḥ |
sa ucchrayātai pra vadāti vācaṃ
tena lokām̐ abhi sarvāñ jayema ||

sapta medhāṃ paśavaḥ pary agṛhṇan
ya eṣāṃ medasvān uta yaś cakarśa |
trayastriṃśad devatās tvāṃ sacante
sa naḥ svargam abhi neṣi lokam ||

svargaṃ lokam abhi no nayāsi
saṃ jāyā saha putraiḥ syāma |
gṛhṇāmi hastam anv aitv atra
mā nas tārīn nirṛtir mo arātiḥ ||

grāhiṃ pāpmānam ati tām̐ ayāma
tamo vyasya pra vadāsi valgu |
vānaspatya udyato mā jihiṃsīr
mā taṇḍulaṃ vi śarīr devayantam ||

viśvavyacā ghṛtapṛṣṭho bhaviṣyaṃ
sayonir lokam upa yāhi vidvān |
varṣavṛddham upa yaccha śūrpe
tviṣiṃ palāvān apa tad vinaktu ||

trayo lokāḥ saṃmitā brāhmaṇena
dyaur evāsau pṛthivy antarikṣam |
aṃśūn gṛbhitān anu saṃrabhethām
ā pyāyantāṃ punar ā yantu śūrpāt ||