Paippalāda-Saṃhitā · Chapter 17.52

pṛthag rūpāṇi bahudhā paśūnām
ekarūpo bhavati saṃ samṛddhyām |
etāṃ tvacaṃ lohinīṃ tāṃ nudethāṃ
grāvā śundhāti malaga iva vastrā ||

janitrīva prati hṛṇyāsi sūnuṃ
saṃ tvā dadhāmi pṛthivīṃ pṛthivyā |
ukhāḥ kumbhīr vedyāṃ saṃcarantāṃ
yajñāyudhair ājyenābhiṣiktāḥ ||

bhūmyāṃ tvā bhūmim adhi dhārayāmi
tanūḥ samānī vikṛtā ta eṣā |
yadyad yuktaṃ likhitam arpaṇaṃ ca
tena mā susror api tad vapāmi ||

agniḥ pacan rakṣatu tvā purastād
indro rakṣād dakṣiṇato mahitvā |
somas tvā dṛṃhād dharuṇe pratīcyā
uttarāt tvā varuṇaḥ saṃ dadātai ||

ā yantu divaḥ pṛthivīṃ sacante
bhūmyāḥ sacante urv antarikṣam |
śuddhāḥ satīs tā u śundhanta eva
tā naḥ svargam abhi lokaṃ nayantu ||

pūtāḥ pavitraiḥ pavante abhrād
divaṃ ca yanti pṛthivīṃ ca lokān |
tā jīvalā jīvadhanyāḥ pratiṣṭhāḥ
pātra āsiktāḥ pary agnir endhām ||

uteva prabhvīr uta saṃmitāsa
uta śukrāḥ śucayaś cāmṛtāsaḥ |
tā odanaṃ dampatibhyāṃ pratiṣṭhā
āpaḥ śikṣantīḥ pravatā sunāthāḥ ||

ud yodhayanty abhi valgantī taptāḥ
phenam asyanti bahulaṃ ca bindum |
yoṣeva dṛṣṭvā patim ṛtviyā yā-
-etais taṇḍulair bhavatā sam āpaḥ ||

saṃkhyātā stokāḥ pṛthivīṃ sacante
prāṇāpānaiḥ saṃmitā oṣadhībhiḥ |
asaṃkhyātā opyamānāḥ suvarṇāḥ
sarvaṃ samāpaṃ śucayaḥ śucitvam ||

utthāpaya sīdato budhna enān
adbhir ātmānam api saṃ sṛjantām |
amāsi pātra udakaṃ yad etan
mitās taṇḍulāḥ pradiśo yatīmāḥ ||