Paippalāda-Saṃhitā · Chapter 17.50

pumān puṃso adhi tiṣṭha carma
tatra hvayasva yatamā priyā te |
yāvantāv agre prathamaṃ sameyathus
tad vāṃ vayo yamarājye samānam ||

tāvad vāṃ tejas tati vīryāṇi
tāvac cakṣus tatidhā vājināni |
agniḥ śarīraṃ sacate yadaidho
adhā pakvān mithunā saṃ bhavāthaḥ ||

sam asmiṃl loke sam u devayāne
saṃ smā sametaṃ yamarājye |
pūtau pavitrair upa tad u hvayethāṃ
yadyad reto adhi vāṃ saṃbabhūva ||

āpaḥ putrāso abhi saṃ viśadhvam
imaṃ jīvaṃ jīvadhanyāḥ sam eta |
tāsāṃ bhajadhvam amṛtaṃ yad āhur
yam odanaṃ pacati vo janitrī ||

yaṃ vaḥ pitā pacati yaṃ ca mātā
riprān nirmukthyai śamalāc ca vācaḥ |
sa odanaḥ śatadhāraḥ svarga
ubhe vyāpa nabhasī mahitvā ||

ubhe nabhasī ubhayāṃś ca lokān
ye yajvanām abhijitāḥ svargāḥ |
teṣāṃ jyotiṣmān madhumān yo agre
tasmin putrair jarasi saṃ śrayethām ||

prācīṃprācīṃ pradiśam ā rabhetām
etaṃ lokaṃ śraddadhānāḥ sacante |
mimāthāṃ pātraṃ tad vāṃ pūrṇam astu
sa vāṃ pakvaḥ pitryāṇe nyāyat ||

dakṣiṇāṃ diśam abhi nakṣamāṇau
pary āvartethām abhi pātram etat |
tasmai vāṃ yamaḥ pitṛbhiḥ saṃvidānaḥ
pakvāya śarma bahulaṃ ni yacchāt ||

pratīcī diśām iyam id varaṃ vāṃ
yasyāṃ somo adhipā mṛḍitā ca |
tasyāṃ mimāthāṃ sukṛtaḥ sacethām
adhā pakvena saha saṃ bhavema ||

uttaraṃ rāṣṭraṃ prajayottarāvad
diśām udīcī kṛṇavan no agram |
pāṅktaṃ chandaḥ puruṣo babhūva
viśvair viśvāṅgaiḥ saha saṃ bhavema ||