પૈપ્પલાદ-સંહિતા · અધ્યાય 17.51

ધ્રુવેયં વિરાણ્ નમો અસ્ત્વ્ અસ્યૈ
શિવા પુત્રેભ્ય ઉત મહ્યમ્ અસ્તુ ।
સા નો દેવ્ય્ અદિતે વિશ્વવાર
ઇર્ય ઇવ ગોપા અભિ રક્ષ પક્વમ્ ॥

પિતેવ પુત્રાઁ અભિ સં સચસ્વ નઃ
શિવા નો વાતા ઇહ વાન્તુ શગ્માઃ ।
યમ્ ઓદનં પચતો દેવતે ઇહ
તં નસ્ તપ ઉત સત્યં મ વિત્તામ્ ॥

યદ્યત્ કૃષ્ણઃ શકુન એહ ગત્વા
ત્સરં વિષક્તં બિલ આસસાદ ।
દાસી વા યદ્ આર્દ્રહસ્તા સમઙ્ક્ત
ઉલૂખલં મુસલં શુન્ધતાપઃ ॥

અયં ગ્રાવા પૃથુબુધ્નો વયોધાઃ
પૂતઃ પવિત્રૈર્ અપ હન્તુ રક્ષઃ ।
આ રોહ ચર્મ મહિ શર્મ યચ્છ
મા દમ્પતી પૌત્રમ્ અઘં નિ ગાતામ્ ॥

વનસ્પતિઃ સહ દેવૈર્ ન આગન્
રક્ષઃ પિશાચાઁ અપબાધમાનઃ ।
સ ઉચ્છ્રયાતૈ પ્ર વદાતિ વાચં
તેન લોકાઁ અભિ સર્વાઞ્ જયેમ ॥

સપ્ત મેધાં પશવઃ પર્ય્ અગૃહ્ણન્
ય એષાં મેદસ્વાન્ ઉત યશ્ ચકર્શ ।
ત્રયસ્ત્રિંશદ્ દેવતાસ્ ત્વાં સચન્તે
સ નઃ સ્વર્ગમ્ અભિ નેષિ લોકમ્ ॥

સ્વર્ગં લોકમ્ અભિ નો નયાસિ
સં જાયા સહ પુત્રૈઃ સ્યામ ।
ગૃહ્ણામિ હસ્તમ્ અન્વ્ ઐત્વ્ અત્ર
મા નસ્ તારીન્ નિરૃતિર્ મો અરાતિઃ ॥

ગ્રાહિં પાપ્માનમ્ અતિ તાઁ અયામ
તમો વ્યસ્ય પ્ર વદાસિ વલ્ગુ ।
વાનસ્પત્ય ઉદ્યતો મા જિહિંસીર્
મા તણ્ડુલં વિ શરીર્ દેવયન્તમ્ ॥

વિશ્વવ્યચા ઘૃતપૃષ્ઠો ભવિષ્યં
સયોનિર્ લોકમ્ ઉપ યાહિ વિદ્વાન્ ।
વર્ષવૃદ્ધમ્ ઉપ યચ્છ શૂર્પે
ત્વિષિં પલાવાન્ અપ તદ્ વિનક્તુ ॥

ત્રયો લોકાઃ સંમિતા બ્રાહ્મણેન
દ્યૌર્ એવાસૌ પૃથિવ્ય્ અન્તરિક્ષમ્ ।
અંશૂન્ ગૃભિતાન્ અનુ સંરભેથામ્
આ પ્યાયન્તાં પુનર્ આ યન્તુ શૂર્પાત્ ॥