Paippalāda-Saṃhitā · Chapter 16.80

ye kukundhāḥ kukūrabhāḥ
kṛttīr dūrśāni bibhrati |
klībā iva pranṛtyanto
ghoṣāṃ ye kurvate vane
tān ito nāśayāmasi ||

yeṣāṃ paścāt prapade
puraḥ pārṣṇī puro mukham |
khalajāḥ śakadhūmajā
uruṇḍā ye ca maṭmaṭāḥ
kumbhamuṣkā ayāśavaḥ |
tān asyā brahmaṇaspate
pratībodhena nāśaya ||

ye sūryaṃ na titikṣanta
ātapantam amuṃ divaḥ |
arāyān bastavāsino
durgandhīṃl lohitāsyān
makakān nāśayāmasi ||

ye sūryāt parisarpanti
snuṣeva śvaśurād adhi |
bajaś ca teṣāṃ piṅgaś ca
hṛdaye 'dhi ni vidhyatām ||

ya ātmānam atimātram
aṃśa ādhāya bibhrati |
strīṇāṃ śroṇipratodina
indra rakṣāṃsi nāśaya ||

ye pūrve vadhvo yanti
haste śṛṅgāṇi bibhrataḥ |
āpākesthān prahāsina
stambe ye kurvate jyotis
tān ito nāśayāmasi ||

paryastākṣāḥ pracaṅkaśā
straiṇāḥ santu paṇḍagāḥ |
ava bheṣaja pātaya
ya imāṃ saṃvivṛtsaty
apatiḥ svapatīṃ striyam ||

uddharṣiṇaṃ munikeśaṃ
jambhayantaṃ marīmṛśam |
upeṣantam udumbalaṃ
tuṇḍenam uta śāluḍam |
padā pra vidhya pārṣṇyā
sthālīṃ gaur iva syandanā ||

yas te garbhaṃ pratimṛśāj
jātaṃ vā mārayāti te |
piṅgas tam ugradhanvā
kṛṇotu hṛdayāvidham ||

ye amno jātān mārayanti
sūtikā anuśerate |
strībhāgān piṅgo gandharvān
abhraṃ vāta ivājatu ||