Scripture Library

Paippalāda-Saṃhitā · Chapter 16.81

16.81.1

pariśiṣṭaṃ dhārayataṃ
yad dhitaṃ māva pādi tat |
garbhaṃ ta ugrau rakṣatāṃ
bheṣajau nīvibhāryau ||

16.81.2

paripāṇaṃ puruṣāṇāṃ
rakṣasām asi cātanam |
arāyān sarvān durṇāmno yātudhānān
viṣūcīnān vi nāśaya ||

16.81.3

pavīnasāt taṅgalvāc
chāyakād uta nagnakāt |
prajāyai patye tvā piṅgaḥ
pari pātu kimīdinaḥ ||

16.81.4

dvyāsyāś caturakṣāḥ
pañcapādād anaṅguleḥ |
vṛndād abhi prasarpataḥ
pari pāhi varīvṛtāt ||

16.81.5

ya āmaṃ māṃsam adanti
pauruṣeyaṃ ca ye kravir
garbhān khādanti keśavāḥ |
arāyān asyā bhaṃsaso
muṣkayor apa hanmasi ||

16.81.6

piṅga rakṣa jāyamānaṃ
pumāṃsaṃ mā striyaṃ kran |
āṇḍādo garbhaṃ mā dabhan
bādhasvetaḥ kimīdinaḥ ||

16.81.7

aprajāstvaṃ mārtavatsam
ād rodam agham āvayam |
vṛkṣād iva srajaṃ kṛtvā-
-apriye prati muñca tat ||

16.81.8

piṅga jahi yātudhānān
durgandhīṃl lohitāsyān |
tvayā praṇuttāḥ kravyādo
viṣvañco yantu nirhatāḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0