Paippalāda-Saṃhitā · Chapter 16.63

ayaṃ te varaṇo maṇiḥ
sapatnakṣayaṇaḥ kṛtaḥ |
tenā rabhasva tvaṃ śatrūn
pra mṛṇīhi durasyataḥ ||

aināñ chṛṇīhi pra mṛṇā rabhasva
maṇis te astu puraetā purastāt |
avārayanta varaṇena devā
abhyācāram asurāṇāṃ śvaḥśvaḥ ||

ā tvārakṣad varaṇo viśvabheṣajaḥ
sahasrākṣo harito hiraṇyayaḥ |
yas te śatrūn adharān pātayāsi
pūrvas tān dabhnuhi ya u tvā dviṣanti ||

ayaṃ te kṛtyāṃ vitatāṃ
pauruṣeyam ayaṃ vadham |
ayaṃ te sarvaṃ pāpmānaṃ
varaṇo vārayiṣyate ||

varaṇo vārayātā
idaṃ devo vanaspatiḥ |
yakṣmaḥ praviṣṭo yo 'smin
tam u devā avīvaran ||

svapnaṃ suptvā yadi paśyāsi pāpaṃ
mṛgaḥ sṛtiṃ yati dhāvād ajuṣṭām |
parikṣavāc chakuneḥ pāpavādād
ayaṃ maṇir varaṇo vārayātai ||

arātyā mā nirṛtyā
abhicārād atho bhayāt |
mṛtyor ojīyaso vadhāt
tvaṃ varaṇa vāraya ||

varaṇena pravyathitā
bhrātṛvyā me sabandhavaḥ |
asūrtaṃ rajo 'py agus
te yantv adhamaṃ tamaḥ ||

yan me mātā yan me pitā bhrātaro
yac ca me svā yad enaś cakṛmā vayam |
tasmān no vārayiṣyate
'yaṃ devo vanaspatiḥ ||

ariṣṭo 'ham ariṣṭagur
āyuṣmān sarvapūruṣaḥ |
taṃ māyaṃ varaṇo maṇiḥ
pari pātu diśodiśaḥ ||