Scripture Library

Paippalāda-Saṃhitā · Chapter 16.64

16.64.1

ayaṃ me varaṇa urasi
rājā devo vanaspatiḥ |
sa me kṣatraṃ ca rāṣṭraṃ ca
paśūn ojaś ca me dadhat ||

16.64.2

imaṃ bibharmi varaṇam
āyuṣmāñ chataśāradaḥ |
sa me śatrūn vi bādhatām
indro dasyūn ivāsurān ||

16.64.3

yathā vāto vanaspatīn
jīrṇān bhanakty ojasā |
evā sapatnāṃs tvaṃ bhaṅdhi
pūrvāñ jātān utāparān
varaṇas tvābhi rakṣatu ||

16.64.4

yathā vātena prakṣīṇā
vṛkṣāḥ śere nyarpitāḥ |
(evā sapatnāṃs) tvaṃ sarvān
pra kṣiṇīhi nyarpaya
pūrvāñ jātān utāparān
varaṇas (tvābhi rakṣatu) ||

16.64.5

yathā vātaś cāgniś ca
sarvān psāto vanaspatīn |
evā sapatnāṃs tvaṃ psāhi
pūrvāñ jātān utāparān
varaṇas tvābhi rakṣatu ||

16.64.6

tāṃs tvaṃ pra chindhi varaṇa
purā diṣṭāt purāyuṣaḥ |
ya imaṃ paśuṣu dipsanti
ye cāsya rāṣṭradipsavaḥ ||

16.64.7

yathā sūryo atibhāti
yathāsmin teja āhitam |
evā sapatnāṃs tvaṃ sarvān
ati bhāhi śvaḥśvo
varaṇas tvābhi rakṣatu ||

16.64.8

yathā yaśaḥ pṛthivyāṃ
yathāsmiñ jātavedasi |
evā me varaṇo maṇiḥ
kīrtiṃ bhūtiṃ ni yacchatu
tejasā mā sam ukṣatu
yaśasā sam anaktu mām ||

16.64.9

yathā yaśo agnihotre
vaṣaṭkāre yathā yaśaḥ |
(…) ||

16.64.10

yathā yaśaḥ somapīthe
madhuparke yathā yaśaḥ |
(…) ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0