Scripture Library

Paippalāda-Saṃhitā · Chapter 16.61

16.61.1

kena devām̐ anu kṣiyati
kena daivīr ajanayad diśaḥ |
kenedam anyan nakṣatraṃ
kena sat kṣatram ucyate ||

16.61.2

kena parjanyam āpnoti
kena somaṃ vicakṣaṇam |
kenemam agniṃ puruṣaḥ
kena saṃvatsaraṃ mame ||

16.61.3

keneyaṃ bhūmir nihitā
kena dyaur uttarā hitā |
kenedam ūrdhvaṃ tiryak ca-
-antarikṣaṃ vyaco hitam ||

16.61.4

brahmaṇā bhūmir nihitā
brahma dyām uttarāṃ dadhau |
brahmedam ūrdhvaṃ tiryak ca-
-antarikṣaṃ vyaco hitam ||

16.61.5

kena śrotriyam āpnoti
kenemaṃ parameṣṭhinam |
kena yajñaś ca śraddhā ca
kenāsmin nihitaṃ manaḥ ||

16.61.6

brahma śrotriyam āpnoti
brahmemaṃ parameṣṭhinam |
brahma yajñaś ca śraddhā ca
brahmāsmin nihitaṃ manaḥ ||

16.61.7

ka idam asthy asṛjata
ka idaṃ māṃsaṃ sam abharat |
ka imāṃ tvacaṃ ca loma ca
ka idaṃ rūpaṃ sam airayat ||

16.61.8

brahmāsthy asṛjata
brahma māṃsaṃ sam abharat |
brahma tvacaṃ ca loma ca
brahma rūpaṃ sam airayat ||

16.61.9

ka idaṃ cakṣur asṛjata
kaḥ prāṇaṃ kheṣv āvayat |
ka idaṃ manaś ca vācaṃ ca
ka imāṃ sam abharat puram ||

16.61.10

brahma cakṣur asṛjata
brahma khe prāṇam āvayat |
brahma manaś ca vācaṃ ca
brahma sam abharat puram ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0