Paippalāda-Saṃhitā · Chapter 16.60
priyāpriyāṇi bahulā
svapnaṃ saṃbādhatandryaḥ |
ānandam ugro nandāṃś ca
tān ud vahati pūruṣaḥ ||
ārtir avartir nirṛtiḥ
kuto nu puruṣe 'matiḥ |
rāddhiḥ samṛddhir avyṛddhir
matir uditayaḥ kutaḥ ||
ko asminn āpo adadhād viṣūvṛtaḥ
purūcyutaḥ sindhusṛtyāya jātāḥ |
tīvrāruṇā lohinīs tāmradhūmrā
ūrdhvā avācīḥ puruṣe tiraścīḥ ||
ko asmin prāṇam adadhāt
ko apānaṃ vyānam u |
samānam asmin ko devo
'dhi śiśrāya pūruṣe ||
ko asmin rūpam adadhāt
ko mahmānaṃ ca nāma ca |
gātuṃ ko asmin kaḥ ketuṃ
kaś caritrāṇi pūruṣe ||
ko asmin reto adadhāt
tantur ā tāyatām iti |
medhāṃ ko asminn adhy auhat
ko bāṇaṃ ko nṛto dadhau ||
ko vāsasā pary adadhāt
ko asyāyur akalpayat |
balaṃ ko asmai prāyacchat
ko asyākalpayaj javam ||
ko asmin yajñam adadhād
eko agre adhi pūruṣe |
ko asmin satyaṃ ko 'nṛtaṃ
ko mṛtyuṃ ko 'mṛtaṃ dadhau
kenāpo anv atanuta
kenāhar akṛṇod ruce |
uṣasaṃ kenānvaindha
kena sāyaṃbhavaṃ dade ||
kenemāṃ bhūmim aurṇot
kena pary abhavad divam |
kenābhi mahnā parvatān
kena karmāṇi pūruṣaḥ ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0