Paippalāda-Saṃhitā · Chapter 16.59

kena pārṣṇī ābhṛte pūruṣasya
kena māṃsaṃ saṃbhṛtaṃ kena gulphau |
kenāṅgulīḥ peśinīḥ kena khāni
kenocchṛṅkhau madhyataḥ kaḥ pratiṣṭhāḥ ||

kasmān nu gulphāv adharāv akṛṇvann
aṣṭhīvantā uttarau pūruṣasya |
nirṛtya jaṅghe ni dadhuḥ kva svij
jānunoḥ sandhī ka imau jajāna ||

catuṣṭayaṃ yujyate saṃhitāntaṃ
jānubhyām ūrdhvaṃ śithiraṃ kabandham |
śroṇī yad ūru ka u taj jajāna
yābhyāṃ kusindhaṃ sudhṛtaṃ babhūva ||

kati devāḥ katame ta āsan
ya uraś cikyur agriyaṃ pūruṣasya |
kati stanau ni dadhuḥ kaḥ kaphoḍau
kati skandhān kati pṛṣṭīr acinvan ||

ko asya bāhū sam abharad
vīryaṃ kṛṇavād iti |
aṃsau ko asya tad devaḥ
kusindha ā dadhād adhi ||

mastiṣkam asya yatamo lalāṭaṃ
kṛkāṭikāṃ prathamo yaḥ kapālam |
citvā cityaṃ puruṣasya hanvor
divaṃ ruroha katamaḥ sa devaḥ ||

kaḥ sapta khāni vi tatarda śīrṣṇi
karṇāv imāv akṣaṇī nāsike mukham |
yeṣāṃ purutrā vijayasya mahmani
catuṣpādo dvipādo yanti yāmam ||

hanvor hi jihvām adadhāt purūcīm
adhā mahīm adhi śiśrāya vācam |
sa ā varīvarti mahinā vyomann
apo vasānaḥ ka u cit pra veda ||

mūrdhānam asya saṃsīvya-
-atharvā hṛdayaṃ ca yat |
mastiṣkād ūrdhvaṃ prairayat
pavamāno 'dhi śīrṣṇaḥ ||

tad vā atharvaṇaḥ śiro
devakośaḥ samubjitaḥ |
tat prāṇo abhi rakṣatu
śriyam annam atho manaḥ ||