Scripture Library

Paippalāda-Saṃhitā · Chapter 16.40

16.40.1

agnim antaś chādayasi
puruṣān paśubhiḥ saha |
vijāvati prajāvati
vi te pāśāṃś cṛtāmasi ||

16.40.2

ūrjasvatī ghṛtavatī
pṛthivyāṃ nimitā mitā |
viśvānnaṃ bibhratī śālā
mā hiṃsīḥ pratigṛhṇataḥ ||

16.40.3

yas tvā pūrvo nimimāya
saṃjabhāra vanaspatīn |
prajāyai cakre tvā śāle
parameṣṭhī prajāpatiḥ ||

16.40.4

namas tasmai namo dātre
śālāpataye ca kṛṇmasi |
namo 'gnaye pracarate
puruṣāya ca te namaḥ ||

16.40.5

gobhyo aśvebhyo namo
yac chālāyāṃ vijāyate |
antarā dyāṃ ca pṛthivīṃ ca yad vyacas
tena śālāṃ prati gṛhṇāmi ta imām ||

16.40.6

yad antarikṣaṃ rajaso vimānaṃ
tat kṛṇva udaraṃ śevadhibhyaḥ |
yac chālāṃ prati gṛṇāmi tasmai ||

16.40.7

tṛṇair āvṛtā paladān vasānā
rātrīva śālā jagato niveśanī |
mitā pṛthivyāṃ tiṣṭhati
hastinīva padvatī ||

16.40.8

yā dvipakṣā catuṣpakṣā
ṣaṭpakṣā yā nimīyate |
aṣṭāpakṣāṃ daśapakṣāṃ
śālāṃ mānasya patnīm
agnir garbha ivā śaye ||

16.40.9

iṭasya te vi cṛtāmy
apinaddham aporṇuvan |
varuṇena samubjitāṃ
mitraḥ prātar vy ubjatu ||

16.40.10

kulāye 'dhi kulāyāṃ
kośe kośaḥ samubjitaḥ |
tatra marto vi jāyate
yasmād viśvaṃ prajāyate ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0