Scripture Library

Paippalāda-Saṃhitā · Chapter 16.39

16.39.1

upamitaḥ pratimito
'tho parimitaś ca yāḥ |
śālāyā viśvavārāyā
naddhāni vi cṛtāmasi ||

16.39.2

yat te naddhaṃ viśvavāre
pāśo granthiś ca yaḥ kṛtaḥ |
bṛhaspatir ivāhaṃ balaṃ
vācā vi sraṃsayāmi tat ||

16.39.3

ā yayāma saṃ babarha
granthiṃ cakāra te dṛḍham |
parūṃṣi vidvāṃ śasteva-
-indreṇa vi cṛtāmasi ||

16.39.4

saṃdaṃśānāṃ paladānāṃ
pariṣvañjalyasya ca |
sarvā mānasya patnyā te
naddhāni vi cṛtāmasi ||

16.39.5

vaṃśānāṃ te nahanāni
prāṇāhasya tṛṇasya ca |
pakṣāṇāṃ viśvavāre te
naddhāni vi cṛtāmasi ||

16.39.6

yāni te antaḥ śikyāny
ābedhū raṇyāya kam |
pra te tāni vi cṛtāmasi
śivā mānasya patni na
uddhitā tanve bhava ||

16.39.7

havirdhānam agniśālaṃ
patnīnāṃ sadanaṃ sadaḥ |
sado devānām asi devi śāle ||

16.39.8

akṣum opaśaṃ vitataṃ
sahasrākṣaṃ viṣūvati |
apinaddham abhihitaṃ
brahmaṇā vi cṛtāmasi ||

16.39.9

yaś ca tvā prati gṛhṇāti
yena cāsi mitā tvam |
ubhau mānasya patni tau
jīvatāṃ jaradaṣṭī ||

16.39.10

amutrainam ā gacchatād
dṛḍhā naddhā pariṣkṛtā |
tasyās te vi cṛtāmasy
aṅgamaṅgaṃ paruṣparuḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0