पैप्पलाद-संहिता · अध्याय 16.39

उपमितः प्रतिमितो
ऽथो परिमितश् च याः ।
शालाया विश्ववाराया
नद्धानि वि चृतामसि ॥

यत् ते नद्धं विश्ववारे
पाशो ग्रन्थिश् च यः कृतः ।
बृहस्पतिर् इवाहं बलं
वाचा वि स्रंसयामि तत् ॥

आ ययाम सं बबर्ह
ग्रन्थिं चकार ते दृढम् ।
परूंषि विद्वां शस्तेव-
-इन्द्रेण वि चृतामसि ॥

संदंशानां पलदानां
परिष्वञ्जल्यस्य च ।
सर्वा मानस्य पत्न्या ते
नद्धानि वि चृतामसि ॥

वंशानां ते नहनानि
प्राणाहस्य तृणस्य च ।
पक्षाणां विश्ववारे ते
नद्धानि वि चृतामसि ॥

यानि ते अन्तः शिक्यान्य्
आबेधू रण्याय कम् ।
प्र ते तानि वि चृतामसि
शिवा मानस्य पत्नि न
उद्धिता तन्वे भव ॥

हविर्धानम् अग्निशालं
पत्नीनां सदनं सदः ।
सदो देवानाम् असि देवि शाले ॥

अक्षुम् ओपशं विततं
सहस्राक्षं विषूवति ।
अपिनद्धम् अभिहितं
ब्रह्मणा वि चृतामसि ॥

यश् च त्वा प्रति गृह्णाति
येन चासि मिता त्वम् ।
उभौ मानस्य पत्नि तौ
जीवतां जरदष्टी ॥

अमुत्रैनम् आ गच्छताद्
दृढा नद्धा परिष्कृता ।
तस्यास् ते वि चृतामस्य्
अङ्गमङ्गं परुष्परुः ॥