Scripture Library

Paippalāda-Saṃhitā · Chapter 16.22

16.22.1

prāṇo mṛtyuḥ prāṇo amṛtaṃ
prāṇaṃ devā upāsate |
prāṇo ha satyavādinam
uttame loka ā dadhat ||

16.22.2

prāṇo virāṭ prāṇo deṣṭrī
prāṇaṃ sarvā upāsate |
prāṇo 'gniś candramāḥ sūryaḥ
prāṇam āhuḥ prajāpatim ||

16.22.3

prāṇāpānau vrīhayavāv
anaḍvān prāṇa ucyate |
yave ha prāṇa āhito
apāno vrīhir ucyate ||

16.22.4

apānati prāṇati
puruṣo garbhe antaḥ |
yadā tvaṃ prāṇa jinvasy
atha sa jāyate tvat ||

16.22.5

prāṇam āhur mātariśvānaṃ
vāto ha prāṇa ucyate |
prāṇe ha bhūtaṃ bhavyaṃ ca
prāṇe sarvaṃ samāhitam ||

16.22.6

ātharvaṇīr āṅgirasīr
daivīr manuṣyajāś ca yāḥ |
sarvāḥ pra modanta oṣadhīr
yadā tvaṃ prāṇa jinvasi ||

16.22.7

yadā prāṇo abhyavarṣīd
varṣeṇa pṛthivīṃ mahīm |
oṣadhayaḥ pra modante
atho yāḥ kāś ca vīrudhaḥ ||

16.22.8

yas te prāṇedaṃ veda
yasmiṃś cāsi pratiṣṭhitaḥ |
sarve asmai baliṃ harān
amuṣmiṃl loka uttame ||

16.22.9

yathā prāṇa balihṛtas
tubhyaṃ sarvāḥ prajā imāḥ |
evā tasmai baliṃ harān
yas tvā śuśrāva śuśruvuḥ ||

16.22.10

antargarbhaś carati devatāsv
ābhūto bhūtaḥ sa u jāyate punaḥ |
sa bhūtaṃ bhavyaṃ bhuvanaṃ bhaviṣyat
pitā putraṃ pra viveśā śacībhiḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0