Paippalāda-Saṃhitā · Chapter 16.21

prāṇāya namo
yasya sarvam idaṃ vaśe |
yo bhūtaḥ sarvasyeśvaro
yasmin sarvaṃ pratiṣṭhitam ||

namas te prāṇa krandāya
namas te stanayitnave |
namas te astu vidyute
namas te prāṇa varṣate ||

yat prāṇa ṛtāv āgate
abhikrandaty oṣadhīḥ |
pra vīyante garbhaṃ dadhate
atho bahvīr vi jāyante ||

yat prāṇa stanayitnunā-
-abhikrandaty oṣadhīḥ |
sarvaṃ tadā pra modate
yad u kiṃ ca bhūmyām adhi ||

yadā prāṇo abhyakrandīd
varṣeṇa stanayitnunā |
paśavas tat pra modante
maho vai no bhaviṣyati ||

abhivṛṣṭā oṣadhayaḥ
prāṇena sam avādiran |
āyur vai naḥ prātītarat
sarvā naḥ surabhīr akaḥ ||

namas te prāṇa prāṇate
namo astv apānate |
pratīcīnāya te namaḥ
parācīnāya te namaḥ
sarvasmai ta idaṃ namaḥ ||

namas te astv āyate
namo astu parāyate |
namas te prāṇa tiṣṭhata
āsīnāyota te namaḥ ||

yā te prāṇa priyā tanū
yā vā te prāṇa preyasī |
atho yad bheṣajaṃ tava
tasya no dhehi jīvase ||

prāṇaḥ prajā anu vaste
pitā putram iva priyam |
prāṇo ha sarvasyeśvaro
yac ca prāṇati yac ca na ||