Paippalāda-Saṃhitā · Chapter 16.15
indrasya prathamo ratho
devānām aparo ratho
varuṇasya tṛtīya it |
ahīnām apamā ratha
sthāṇum ārad athā riṣat ||
darbhaḥ śocis tarūṇakam
aśvasya vāraḥ puruṣasya vāraḥ |
rathasya bandhuram
ahīnām arasaṃ viṣaṃ vār id ugram ||
ava śveta padā jahi
pūrveṇa cāpareṇa ca |
udaplutam iva dārv
ahīnām arasaṃ viṣaṃ vār id ugram ||
araṃghaso nimajya-
-unmajya punar abravīt |
udaplutam iva dārv
ahīnām arasaṃ viṣaṃ vār id ugram ||
paidvo hanti kaṣarṇīlaṃ
paidvaḥ śvitram utāsitam |
paidvo ratharvyāḥ śiraḥ
saṃ bibheda pṛdākvāḥ ||
paidva prehi prathamo
anu tvā vayam emasi |
ahīn vy asyatāt patho
yena smā vayam emasi ||
idaṃ paidvo ajāyata-
-idam asya parāyaṇam |
imāny arvataḥ padā-
-ahighnyo vājinīvataḥ ||
saṃyataṃ na vi ṣparad
vyāttaṃ na saṃ yamat |
asmin kṣetre dvāv ahī
strī ca pumāṃś ca tā ubhā arasā ||
arasāsa ihāhayo
ye anti ye ca dūrake |
ghanena hanmi vṛścikam
ahiṃ daṇḍenāgatam ||
aghāśvasyedaṃ bheṣajam
ubhayoḥ svajasya ca |
indro mahyam aghāyantam
ahiṃ paidvo arundhayat ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0