Scripture Library

Paippalāda-Saṃhitā · Chapter 16.16

16.16.1

paidvasya manmahe vayaṃ
sthirasya sthiradhāmnaḥ |
ime paścāt pṛdākavaḥ
pradīdhyata āsate ||

16.16.2

naṣṭāsavo naṣṭaviṣā
hatā indreṇa vajriṇā |
jaghānendro jaghnimā vayam ||

16.16.3

hatās tiraścirājayo
nipiṣṭāsaḥ pṛdākavaḥ |
darviṃ karikrataṃ śvitraṃ
darbheṣv asitaṃ jahi ||

16.16.4

kairātikā kumārikā
sakhā khanati bheṣajam |
hiraṇyayībhir abhribhir
girīṇām upa sānuṣu ||

16.16.5

āyam agan yuvā bhiṣak
pṛśnihāparājitaḥ |
sa vai svajasya jambhana
ubhayor vṛścikasya ca ||

16.16.6

indro me 'hīn ajambhayan
mitraś ca varuṇaś ca |
vātāparjanyobhā ||

16.16.7

paidvo me 'hīn ajambhayat
pṛdākūṃś ca pṛdākvaḥ |
svajān tiraścirājīn
kasarṇīlān daśonaśīn ||

16.16.8

indro jaghāna prathamo
janitāram ahe tava |
teṣāṃ vas tṛhyamāṇānāṃ
kaḥ svit teṣām asad rasaḥ ||

16.16.9

saṃ hi śīrṣāṇy agrabhaṃ
pauñjiṣṭa iva karvaram |
sindhor madhyaṃ paretya
vy anijam aher viṣam ||

16.16.10

ahīnāṃ sarveṣāṃ viṣaṃ
parā vahantu sindhavaḥ |
hatās tiraścirājayo
nipiṣṭāsaḥ pṛdākavaḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0