Paippalāda-Saṃhitā · Chapter 16.14
tasyāmṛtasyemaṃ balaṃ
puruṣaṃ pārayāmasi |
atho kṛṇomi bheṣajaṃ
yathāsac chatahāyanaḥ ||
varāho veda vīrudhaṃ
nakulo veda bheṣajīḥ |
gandharvāḥ sarpā yā vidus
tā ihā yantv oṣadhīḥ ||
yāḥ suparṇā āṅgirasīr
divyā yā raghaṭo viduḥ |
vayāṃsi haṃsā yā vidur
yāś ca sarve patatriṇaḥ |
mṛgā yā vidur oṣadhīs
tā asmā avase huve ||
yāvatīnām oṣadhīnāṃ
gāvaḥ prāśnanty aghnyā
yāvatīnām ajāvayaḥ |
tāvatīr viśvabheṣajīr
ā bharāmi tvām abhi ||
yāvatīṣu manuṣyā
bheṣajaṃ bhiṣajo viduḥ |
tāvatīs tubhyam ābhṛtāḥ
śarma yacchantv oṣadhīḥ ||
puṣpavatīḥ prasūmatīḥ
phalinīr aphalā uta |
saṃmātara iva duhrām
asmā ariṣṭatātaye ||
ut tvāhārṣaṃ pañcaśalād
ut tvā daśaśalād uta |
ut tvā yamasya paḍvīśād
oṣadhībhir apīparam ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0