Paippalāda-Saṃhitā · Chapter 14.8

iṣirā yoṣā yuvatīr damūnā
rātrī devasya savitur bhagasya |
aśvakṣatā suhavā saṃbhṛtaśrīr
ā paprau dyāvāpṛthivī mahitvā ||

ava viśvāny aruhad gabhīrā-
-udvarṣiṣṭham aruhad aśramiṣṭhā |
uśatī rātry anu sānu bhadrād
vi tiṣṭhate mitra iva svadhābhiḥ ||

narye vandye subhage sujāta
ā cāgan rātri sumanā iha syām |
asmāṃs trāyasva naryāṇi jātā-
-aśvyā yāni gavyāni puṣṭā ||

siṃhasya rātry uśatī piśasya
vyāghrasya dvīpino varca ā dade |
aśvasya bradhnaṃ puruṣasya māyaṃ
puru rūpāṇi kṛṇuṣe vibhātī ||

śivāṃ rātrim ahni sūryaṃ ca
himasya mātā suhavā no astu |
asya stomasya subhage ni bodha
yena tvā vande viśvāsu dikṣu ||

stomasya no vibhāvari
rātri rājeva joṣasai |
asāma sarvavīrā
bhavāma sarvavedaso vyucchantīr anūṣasaḥ ||

śamyā ha nāma dadhiṣe
mama dipsanti ye dhanā |
rātrīha tān asad apa-
-atha steno na vidyate
atha ripur na vidyate ||

bhadrāsi rātri camaso na piṣṭo
viśvaṃ gorūpaṃ yuvatir bibharṣi |
cakṣuṣmatī me mṛśatī vapūṃṣi
prādityān divyān rukmām̐ amukthāḥ ||

yo adya stena āyaty
aghāyur martyo ripuḥ |
rātrī tasya pratītya
pra grīvā pra śiro hanat ||

pra pādau na yathāyati
pra hastau na yathāśiṣat |
yo malimlar upāyati
sa saṃpiṣṭo apāyati |
apāyati sv apāyati
śuṣke sthāṇāv apāyata ||