Scripture Library

Paippalāda-Saṃhitā · Chapter 14.7

14.7.1

sahasreṇa śatamānā yad eṣi
lokāṃ jigetha prathamā śataudane |
sarvavedasam uta vājapeyaṃ
sarvām̐l lokāṃ chataudanā samāpa ||

14.7.2

indraḥ papāta prathamaḥ śataudanāṃ
sapta ṛṣibhyaḥ sumanasyamānaḥ |
tayāsurāṇāṃ balam oja ā dade
tayā ruroha viṣṭapo devalokān ||

14.7.3

viśvāmitro 'yaṃ jamadagnir atrir
bharadvājo gotamo 'yaṃ vasiṣṭhaḥ |
idaṃ pakvaṃ kaśyapasaptamāḥ
prāśnantu prathamāḥ śataudanām ||

14.7.4

jyotiṣmatī prathamā śataudanā
trīṇi jyotīṃṣi kṛṇute svar yatī |
tāṃ dātāra upa jīvanti yatra
tatra devaiḥ sadhamādaṃ madanti ||

14.7.5

chandaḥpakṣā bṛhatī śataudanā
trīṇi cchandāṃsi sasṛje svar yatī |
ṛtūṇām adhirājaṃ saṃvatsaraṃ
patim asyā vindan ||

14.7.6

atikramyāgniṣṭomam
atirātraṃ śataudane |
yajñāṃs tvaṃ sarvān āptvā
cityam agniṃ vy aśnuhi ||

14.7.7

aśvamedhyam atikramya
dvādaśāhaṃ śataudane |
trirātraṃ sāhnam āptvā
vājapeyena kalpate ||

14.7.8

ye sahasrair ījānā
agnihotrahutaś ca ye |
yajñair ye sarvair ījānās
tān āpnoti śataudanā ||

14.7.9

śaṃ te parūṃṣi subhage dadhāmi
śaṃ te māṃsāny attathā bhavanti |
asthi yat te śamitā śaśāra
tat te tvaṣṭā vihṛtaṃ niṣ kṛṇotu ||

14.7.10

ye yajñena jitā lokā
yā nu cchandāṃsi bhejire |
sarvāṃs tām̐l lokān āpnoti
yo dadāti śataudanām ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0