Paippalāda-Saṃhitā · Chapter 14.6
divaṃ prehi śataudane
sahasrasyāyanaṃ bhava |
ayutaṃ prayutaṃ bhava-
-akṣitir bhavatāt tvaṃ
svargaṃ lokam āruhaḥ ||
śataudanāṃ śatadhā bhakṣayanti
śataṃ rohān rohati yo dadāti |
vāmadevyaṃ naudhasam asyāḥ pakṣau
tṛtīye nāke adhi viṣṭapi śritā ||
śataudanāṃ śatadhā kalpamānā
śataṃ rūpāṇi kṛṇute svaryatī |
sā no devī suhavā śarma yacchatv
atho mṛḍātīdṛśe ||
śataudanā dvādaśāhena saṃmitā
śataṃ pṛṣṭhāni sasṛje svaryatī |
sarvān yajñān pariyatī parastāt
sā dātāraṃ rāyaspoṣe dadhātu ||
abhi prehi śataudana
ījānān somasatvanaḥ |
yajñāṃs tvaṃ sarvān āptvā
kāmaprasyāyanaṃ bhava ||
abhi prehi śataudane
yajñenāyajvanas tara |
ā devayūn arūruho
yatrādas tridivaṃ divaḥ ||
īrāpadī prathamā śataudanā
satyaṃ ha madhyam amṛtaṃ śiras tava |
ubhe devī rodasī ā pṛṇāsi ||
ṛtaṃ ha śroṇī uta sakthau tanvā-
-ojo ha bāhū uta tad balāya kam |
anuṣṭhu jaṭharam ād u pārśve
sarvām̐l lokāṃ chataudanā samāpa ||
cakṣuṣmatī prathamā śataudanā
sūryo ha cakṣur uta candramās tava |
viśvair devair ṛtubhiḥ saṃvidānā
sā dātāraṃ tṛptyā tarpayāsi ||
śataṃ payāṃsi śatam asyā vatsāḥ
śatadhā pakvāṃ vi bhajanty enām |
sapta lokā divy ārpitā ye tāṃ
jigetha prathamā śataudane ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0