Paippalāda-Saṃhitā · Chapter 13.7

kim indrasya parihitaṃ kim agneḥ
kiṃ viṣṇos tvaṣṭur varuṇasya vāsaḥ |
bṛhaspater uta somasya rājñaḥ
kiṃ vasānā maruto varṣayantu ||

dhātū rudrasya kiṃ vāyor
vājināṃ vasanaṃ mahat |
kiṃ pūṣā brahmaṇaspatir
viśve devāś ca bibhrati ||

kiṃ devānāṃ paridhānaṃ samānaṃ
yasminn eṣāṃ sāṃmanasyaṃ babhūva |
kva rātrī niviśate kvāhaḥ kvedam
abhraṃ bhavati yat sameti vyeti ca ||

katamenāpo divam udvahanti
kaḥ samenodayanena netā |
vātasya tvā vidyutāṃ stanayitnur
apāṃ pṛcchāmy ayanāny agneḥ ||

pṛcchāmi tvā pṛṣatīṃ rohiṇīṃ ca
vatsaṃ pṛcchāmi saha mātaraṃ tvā |
indraṃ tvānu pṛcchāmi sākṣāt
sabhānāṃ ca sabhāpatim ||

ko vayasām adadhān nāmāni kaḥ paśūnāṃ
kaḥ sarpāṇāṃ devajanā ya āsan |
ko 'sya jantor adadhād brūhi nas tat ||

kati rohāḥ svar ā rohayanti
yebhī rohito divam āruroha |
rāṣṭrabhṛtaḥ kṣatrabhṛto vasubhṛto
vasudānavo vasuyavaḥ ||

kaś caturdhā vi kramate mahitvā
kaṃ rakṣanti kavayo 'pramādam |
puruṣaṃ tvānu pṛcchāmi sākṣān
mṛtyor aṅgāni kati tāni vettha ||

yaṃ siṣeva vṛṣabhaś carṣaṇīṇām
indro vajram ahīnā spardhamānaḥ |
yena vṛtraṃ maghavā saṃpipeśa
taṃ naḥ pra brūhi yadi taṃ pravettha ||

kaḥ parvatānām adadhān nāmāni
ko vanaspatīnām adadhād oṣadhīnām |
pṛcchāmi tvā bhuvanasya nābhiṃ
gāṃ tvā pṛcchāmi katamāni sākṣāt ||