પૈપ્પલાદ-સંહિતા · અધ્યાય 13.7

કિમ્ ઇન્દ્રસ્ય પરિહિતં કિમ્ અગ્નેઃ
કિં વિષ્ણોસ્ ત્વષ્ટુર્ વરુણસ્ય વાસઃ ।
બૃહસ્પતેર્ ઉત સોમસ્ય રાજ્ઞઃ
કિં વસાના મરુતો વર્ષયન્તુ ॥

ધાતૂ રુદ્રસ્ય કિં વાયોર્
વાજિનાં વસનં મહત્ ।
કિં પૂષા બ્રહ્મણસ્પતિર્
વિશ્વે દેવાશ્ ચ બિભ્રતિ ॥

કિં દેવાનાં પરિધાનં સમાનં
યસ્મિન્ન્ એષાં સાંમનસ્યં બભૂવ ।
ક્વ રાત્રી નિવિશતે ક્વાહઃ ક્વેદમ્
અભ્રં ભવતિ યત્ સમેતિ વ્યેતિ ચ ॥

કતમેનાપો દિવમ્ ઉદ્વહન્તિ
કઃ સમેનોદયનેન નેતા ।
વાતસ્ય ત્વા વિદ્યુતાં સ્તનયિત્નુર્
અપાં પૃચ્છામ્ય્ અયનાન્ય્ અગ્નેઃ ॥

પૃચ્છામિ ત્વા પૃષતીં રોહિણીં ચ
વત્સં પૃચ્છામિ સહ માતરં ત્વા ।
ઇન્દ્રં ત્વાનુ પૃચ્છામિ સાક્ષાત્
સભાનાં ચ સભાપતિમ્ ॥

કો વયસામ્ અદધાન્ નામાનિ કઃ પશૂનાં
કઃ સર્પાણાં દેવજના ય આસન્ ।
કો ઽસ્ય જન્તોર્ અદધાદ્ બ્રૂહિ નસ્ તત્ ॥

કતિ રોહાઃ સ્વર્ આ રોહયન્તિ
યેભી રોહિતો દિવમ્ આરુરોહ ।
રાષ્ટ્રભૃતઃ ક્ષત્રભૃતો વસુભૃતો
વસુદાનવો વસુયવઃ ॥

કશ્ ચતુર્ધા વિ ક્રમતે મહિત્વા
કં રક્ષન્તિ કવયો ઽપ્રમાદમ્ ।
પુરુષં ત્વાનુ પૃચ્છામિ સાક્ષાન્
મૃત્યોર્ અઙ્ગાનિ કતિ તાનિ વેત્થ ॥

યં સિષેવ વૃષભશ્ ચર્ષણીણામ્
ઇન્દ્રો વજ્રમ્ અહીના સ્પર્ધમાનઃ ।
યેન વૃત્રં મઘવા સંપિપેશ
તં નઃ પ્ર બ્રૂહિ યદિ તં પ્રવેત્થ ॥

કઃ પર્વતાનામ્ અદધાન્ નામાનિ
કો વનસ્પતીનામ્ અદધાદ્ ઓષધીનામ્ ।
પૃચ્છામિ ત્વા ભુવનસ્ય નાભિં
ગાં ત્વા પૃચ્છામિ કતમાનિ સાક્ષાત્ ॥