Padma Purana · Chapter 7.6

rājovāca-
tiṣṭhātraiva mahābāho mama rājye suśobhane /
kartavyā te mayā vṛttiḥ saṃśayo nātra vidyate

tato vīravarastasya sannidhau dharaṇīpateḥ /
uvāsa satataṃ vipra tatsevā gatamānasaḥ

athaikadā tasya pure jaimine sakalāḥ prajāḥ /
bhīmanādo nāma khaḍgaḥ kṣobhayāmāsa saṃtatam

tadvadhāya tato rājā preṣayāmāsa taṃ ruṣā /
tato'sau gaṃḍakaṃ haṃtu yayau vīravaro janaiḥ

dadarśa parvatākāraṃ suptaṃ taṃ dharaṇītale /
daṃṣṭrākarālavadanaṃ khaḍginaṃ taṃ saśaktidhṛk

nabhasi bhrāmayansaptiṃ sa ca vīravaro ruṣā /
khaḍginaṃ tamiti prāha meghagaṃbhīrayā girā

upārjitāstvayā ye ye durātmanpāpapādapāḥ /
babhūvuḥ phalinaste te ṛtuṃ prāpya yathā drumāḥ

khāditāḥ prāṇino ye ye rājye'sminpāpinā tvayā /
yamālaye samastaistairdarśanaṃ te bhaviṣyati

muṃca nidrāmare duṣṭa māṃ paśyāntakaraṃ nijam /
anayā nidrayā kinte mahānidra bhaviṣyati

tataḥ so'pi samuttasthau krodhasaṃraktalocanaḥ /
dhūlidhūsarasarvāṅgastyaktanidro mahābalaḥ

bhīmanāda uvāca-
garvaṃ mā kuru durbuddhe tavāyuḥ śeṣatāṃ gatam /
tatsaṃdarśanamātreṇa prāptaḥ konu vimucyate

jvaladagniśikhāśreṇīṃ praviśecchalabho yathā /
matkopānalarāśau tvaṃ tathaiva nipatiṣyasi

iti bruvaṃtaṃ taṃ draṣṭuṃ śaktyā niśitayā tayā /
sa jajvāla mahākopātkṛtvā huṃkāraniḥsvanam

sa papāta mahīpṛṣṭhe gatāyurgaṃḍakastataḥ /
cālayanpṛthivīṃ sarvāṃ svanitaugha pariplutaḥ

khaḍginaṃ patitaṃ dṛṣṭvā gaṅgābdhirodhasi dvija /
samīpaṃ tasya bhūpasya sa gaṃtumupacakrame

sa gacchanpathiviprarṣe dadarśaikaṃ mahāśayam /
jājvalyamānaṃ tejobhirdvitīyamiva bhāskaram

viṣṇudūtagaṇairyuktaṃ tulasīmālyabhūṣitam /
divyāmbaradharaṃ divyaṃ rathārūḍhaṃ smitānanam

papraccheti tato bhaktyā sa ca vīravaraśca tam /
kastvaṃ kuta ihāyātaḥ kva gacchasi vadasva naḥ

puruṣa uvāca-
kanyevidhṛtapuṃveśe madvṛttāṃtaṃ niśāmaya /
kathayāmi samāsena śrotumicchasi cenmudā

ahamāsaṃ purā rājā cauravaṃśavanānalaḥ /
dharmabuddhiriti khyātaḥ sarvadharmaparāyaṇaḥ

mayā yajñāḥ kṛtāḥ sarve dānāni sakalāni ca /
caturvarṣasahasrāṇi pālitā ca vasundharā

pākhaṇḍajanavākyena mayā bhūmirdvijanmanaḥ /
laṃghitā kopamāsādya doṣitā na hi kutracit

mayā tenāparādhena svayameva vidhistataḥ /
jahāra tatkṣaṇādeva sarvāṃ rājaśriyaṃ ruṣā

athāhaṃ gatasaṃpattiḥ śokāgnidagdhamānasaḥ /
kiyidbhirdivasaiḥ sādhvi yamarājavaśaṃ gataḥ

māṃ dṛṣṭvā citraguptena tatkarmaprakaṭīkṛtam /
uktaśca bhāskarirdevaścāruhāsagatiḥ prabhuḥ

dharmabuddhirayaṃ rājā kṛtapuṇyakriyaḥ sadā /
astyasya duritaṃ kiñcittanniśāmaya vacmyaham

pākhaṇḍairbodhito'yaṃ tu jahāra dvijaśāsanam /
tenaiva karmaṇā sthānaṃ narake cāsyaduttare

vṛtticchedaḥ sūryaputra yasya yena vidhīyate /
sa tasya vadhamāpnoti śāstreṣu iti niścitam

tasmādayaṃ pāpakarmā brahmahā pṛthivīpatiḥ /
etasya niraye sthānaṃ kalpakoṭiśatāvadhi

ātmadattāṃ haredyastu paradattāṃ ca medinīm /
sa koṭikulasaṃyuktaḥ prayāti narakaṃ vibho

yo harecca mahīṃ tāvaddevasya brāhmaṇasya ca /
na tasya niṣkṛtirdṛṣṭā kalpakoṭiśatāvadhi

paradattāṃ kṣitiṃ yastu rakṣituryastu rakṣati /
sa koṭiguṇamāpnoti puṇyaṃ dātṛguṇādapi

tato'haṃ śamanādeśādbhuktvā vai pūtimṛttikām /
kalpayonau prāṇihiṃsā sarvadaiva mayā kṛtā

gāvaśca brāhmaṇāścaiva tathaivānye'pi jīvinaḥ /
mayā duṣṭena nihatāḥ koṭikoṭisahasraśaḥ

kālena preritā sādhvi māṃ sarvakṣayitāśrayam /
khaḍgayoniṃ samutpannaṃ bhavatī prajaghāna ha

gaṅgābdhisaṅgamaṃ tīrthaṃ durllabhaṃ daivatairapi /
sthale'pi mṛtyumāsādya yatreyaṃ mama sadgatiḥ

gaccha suśroṇi bhadraṃ te bhaviṣyati na saṃśayaḥ /
acireṇaiva patinā darśanaṃ te bhaviṣyati

vyāsa uvāca-
tasyaitadvacanaṃ śrutvā sā kanyā paramādbhutam /
vavaṃde caraṇau tasya dharmabuddhirmahīpatiḥ

tato rathaṃ samāruhya sa rājā tridivaṃ yayau /
so'pi vīravaro vipra jagāma nṛpateḥ sabhām

rājā ca taṃ mṛtaṃ śrutvā khaḍginaṃ bhīmavikramam /
tasyai dadau vivāhena jayaṃtīṃ nijakanyakām

jayaṃtīṃ tāṃ samādāya sā kanyā puruṣākṛtiḥ /
tapastaptuṃ manaścakre gaṅgāsāgarasaṅgame

gaṅgābdhisaṃgame snātvā prabhāte dvijasattama /
gītairvādyaiśca nṛtyaiśca yajennārāyaṇaṃ prabhum

nirāmiṣaṃ haviṣyaṃ ca phalāhāraṃ dvijottama /
kadācidupavāsaṃ sā kurute ca varāṅganā

ekākinīṃ samālokya ko'grahīdatra bhūtale /
māṃ nīcamiti matvāsau samāruhya ca vājinam

bhūya eva nijaṃ rājyaṃ sājagāma varāṅganā /
mādhavasya viyogena tasya vidyādharasya vā

mṛtā sā rājatanayā yato'nyaṃ na bhajatyapi /
tasyāṃ mṛtāyāṃ bhṛtyo'sau nirjagāma yadṛcchayā

vilapya bahudhā tatra praceṣṭo'tyaṃta śokabhāk /
jagāma maraṇārthāya gaṅgāsāgarasaṅgamam

gaṅgābdhisaṅgame snātvā tulasīmṛdvibhūṣitaḥ /
kṛtāñjaliriti prāha praceṣṭo bhīṣmamātaram

pavitre tvajjale mātastyajāmyatra kalevaram /
sulocanā me kāṃtāsyādyathātattvaṃ kariṣyasi

bhūyobhūyo bruvaṃtaṃ tamiti tasyāśca kiṃkarāḥ /
badhvā pāśena taṃ ninyurniruktāṃ tatsabhāṃ prati ५०

taptā vīravarādeśātkiṃkarāste sudāruṇāḥ /
kārāyāṃ sthāpayāmāsuḥ praceṣṭamanuvihvalam

etasminneva kāle tu dṛṣṭvā tatkāryamadbhutam /
hāhākāro mahānāsīttadrājye dvijasattama

etacchrutvādbhutaṃ karma sa ca rājā guṇākaraḥ /
āyāto'tyaṃta saṃtapto vadatīti dvijottama

niṣaṃgiṇaśca rathinaścarmiṇaḥ khaḍginastathā /
dhānuṣkāśca kauṃtakāśca koṭikoṭisahasraśaḥ

sthāne sthāne pure tasminrājā vai śokavihvalaḥ /
niyojayāmāsa tadā rakṣāyai dvijasattama

tenājñaptāstataḥ sarve yoddhāro'mitavikramāḥ /
satvarāḥ patirakṣāsu tasthustasminpure ruṣā

gītāni gāyakaiḥ sarvairnṛtyāni nartakaistathā /
vādyāni vādakaiścaiva tatra tyaktāni sādhvasaiḥ

tataḥ sa rājā viprarṣe samāhūya svamaṃtriṇaḥ /
kimetaditi papraccha śokopahatamānasaḥ

maṃtriṇa ūcuḥ-
devādbhutamidaṃ karma na dṛṣṭaṃ na śrutaṃ kvacit /
etāvatāṃ nṛṇāṃ madhye paśyatāṃ kva jagāma sā

ko'pi jalpati sā lakṣmīḥ śāpenāgatya bhūtale /
tvadīyaṃ saudhametarhi svayamaṃtaradhīyata

māyāmayī sā ramaṇī māyayā tvadgṛhe sthitā /
māyāṃ svakīyāṃ darśitvā gatetyanye vadaṃti vai

kecidvadaṃti ramaṇī sarvalakṣaṇasaṃyutā /
āgamiṣyati bhūyo'pi bhagāṅgo maghavā yataḥ

tanmukhaṃcandravanmatvā viciṃtyātmānamātmanā /
kecidvadaṃti candreṇa nītā supratipattaye

vadaṃti ke'pi sā kanyā sadguṇā dīrghavāsanā /
bhrāntyā candramasā grastā pūrṇacaṃdranibhānanā

diggajairnalinī bhrāntyā praphullakamalānanā /
viṣadaṇḍaprahastā ca nīrajā kalikākucā

kecidvadaṃti sṛṣṭvā sā sraṣṭumanyāṃ striyaṃ nṛpaṃ /
tadrūpādarśanālokye nītā rūpaguṇāsthitā

kecidvadaṃti bhūpāla tvayā sarvadiśo jitāḥ /
rūpairdaivāṃganā jetuṃ gatā sā tridivaṃ prati

atha te maṃtriṇo'nyonyamālokyeti mukhaśriyaḥ /
stabdhā ivābhavansarve nirutsāhāḥ sasādhvasāḥ

bhūpaḥ sulocane putri kva gatāsi vihāya mām /
ityuktvā sa mahīpālaḥ pṛthivyāṃ mūrcchito'patat

rājānaṃ patitaṃ dṛṣṭvā śokena mahatā tataḥ /
jajñe hāhāravastasminnagare dvijasattama

tatkraṃdanadhvaniṃ vipra pratiśrutvā ca jāyate /
utprekṣate tatra loke kraṃdaṃti kakubho daśa

dhūlidhūsaratāṃ gaṃtuṃ nṛpatiṃ muktakeśakam /
vidhṛtya maṃtriṇaḥ sarve tarasā saudhamāyayuḥ

atha vidyādharastatra śrīvikramadevajaḥ /
tasyāḥ pīṭhaṃ samāliṅgya ruroda karuṇasvanaiḥ

hā priye caṃcalāpāṅgi suvarṇakusumaprabhe /
śokābdhau pātayitvā māṃ kva gatāsi varānane

mama kiṃ dūṣaṇaṃ dṛṣṭaṃ tvayā nirdoṣayā priye /
na dadāsi kathaṃ bhadre darśanaṃ kamalānane

na jīviṣyāmyaṃhaṃ bhadre kṣaṇamātraṃ tvayā vinā /
ato me darśanaṃ datvā kriyatāṃ prāṇarakṣaṇam

kiṃ dhanaiḥ kiṃ janaiḥ kiṃ me mitraiḥ kiṃ vā dhanairgṛhaiḥ /
nāpnomi yadi bhadre tvāṃ prāṇebhyo'pi garīyasīm

etaccānyacca viprarṣe sa kṛtvā karuṇaṃ mahat /
śokānmṛtyuṃ viniściṃtya yayau gaṅgābdhisaṅgamam

tatra gaṅgāmbhasi snātvā samudrajalamiśrite /
nivedya bhāskarāyārghaṃ gaṃgāṃ natvāha mātaram

gaṃṅge devi jaganmātastvajjale vimale tanum /
tyajāmi tāṃ yathā bhūyaḥ prāpnomi tatkariṣyasi

iti bruvaṃtaṃ taṃ vipra tatkiṃkaravarāstataḥ /
vidhiṃ vininyuḥ sadṛśaṃ kruddhā vīravarasya ca

tato vīravaraḥ prāha kastvaṃ bhoḥ kuta āgataḥ /
kathamatra tanutyāgaṃ kuruṣe tadvadasva me

tadvākyametadākarṇya tato vidyādharo'khilām /
tāṃ kathāṃ kathayāmāsa śṛṇvatāṃ vismayapradām

atha tvaṃ mūrkhalokānāṃ pravarosi na saṃśayaḥ /
gāndharvī rākṣasī vāpi pannagī vāpi kinnarī

śāpāgateva sā kanyā tasmādantarhitā svayam /
sā devarūpiṇī kanyā devānāṃ nilayaṃ gatā

kathaṃ tayā samaṃ bhūyo darśanaṃ te bhaviṣyati /
cakorapeyaṃ pīyūṣaṃ gagane rohiṇīpateḥ

kiṃ śaknuvaṃti taṃ pāpā vāyasā balino'pi ca /
yadaprāpyaṃ na tatprāpyaṃ prāpyaṃ yattacca labhyate

jānaṃti tajjanaṃ kaścinmohaṃ prati na gacchati /
kenāpi dīyate kanyā kanyā kenāpi gṛhyate

pūrvajanmani yā kanyā tāṃ kanyāṃ labhate patiḥ /
putraprayojanā bhāryā putrāḥ piṇḍaprayojanāḥ

kurvaṃti dāragrahaṇamataeva manīṣiṇaḥ /
yatheha dīyate nāryā tathā nārī samaśnute

kraṃdanrajanyāmapyeṣa bhṛṅgaḥ kumudinīṃ sahet /
sadrūpo'pi patiḥ strīṇāṃ saṃtoṣāya bhavennahi

ravau sthite'pi padminyā madhūni bhramaraḥ pibet /
nārīṣu satataṃ cittaṃ viṣṇubhaktiṣvanādaraḥ

śokaiḥ kaiścittanutyāgastisraḥ puṃsāṃ viḍaṃbanāḥ /
dārāḥ putrāstathā bhrātā deśāśca bāṃdhavāstathā

punarlabhyā ime sarve punarlabhyā na cāsavaḥ /
na mukto viṣayo dharmo na ca karma kṛtaṃ tvayā

vartamāne gate mūḍha bhaviṣyaṃ janma durllabham /
mama mātā mama pitā bhāryā bhrātā dhanaṃ mama

niṣphalaṃ yāti vai janma nṛṇāṃ mamatayā tayā /
evaṃ prabodhitaḥ samyaktena dhīravareṇa saḥ

daurmanasyaṃ parityajya tasthau tatraiva jaimine /
tatastu gandhinī prītyā hasaṃtī svagṛhaṃ gatā

gatvā ca mādhavaṃ maṃce svapaṃtaṃ sā dadarśa ha /
gandhinyuvāca-
uttiṣṭhottiṣṭha durbuddhe bhramaste viphalo'bhavat

vivāhakāle sā kanyā babhūvāṃtarhitā svayam /
evaṃ tasyā vacaḥ śrutvā samuttasthau sa mādhavaḥ

vilalāpākulaḥ śokairmahadbhiḥ kṣmātale luṭhan /
kanyāyā dūṣaṇaṃ nāsti nāsti vidyādharasya vā १००